Соңғы жылдары Қазақстанға халықаралық инвесторлардың қызығушылығы айтарлықтай артып, ел Орталық Азиядағы шетелдік капиталдың негізгі бөлігін өзіне тартып отыр, деп хабарлайды dalanews.kz.
БҰҰ-ның Сауда және даму жөніндегі конференциясының (UNCTAD) 2025 жылғы World Investment Report баяндамасына сәйкес, тәуелсіздік жылдарынан бері Қазақстанға тартылған тікелей шетелдік инвестиция көлемі $151 млрд-тан асты. Бұл Орталық Азия елдеріне келген инвестициялардың шамамен 70%-ына тең.
Әлемде геосаяси тұрақсыздық пен капитал үшін бәсеке күшейгеніне қарамастан, Қазақстан өңірдегі инвестициялық тартымдылығын сақтап қалды. Сарапшылар мұны елдің стратегиялық орналасуы, табиғи ресурстары, транзиттік әлеуеті және институционалдық реформалармен байланыстырады.
Халықаралық инвесторлардың қызығушылығы артты
Соңғы жылдары Қазақстанға Еуропа, АҚШ, Қытай, Парсы шығанағы елдері мен Таяу Шығыстың ірі компаниялары белсенді инвестиция салуда. Инвестициялар негізінен энергетика, көлік-логистика, цифрландыру, өңдеу өнеркәсібі және жаңартылатын энергия көздеріне бағытталған.
Мәселен, 2026 жылы француздық TotalEnergies компаниясы Қазақстандағы қуаты 1 гигаватт болатын «Мирный» жел электр станциясына $1,2 млрд инвестиция салу туралы шешім қабылдады. Жобаға БАӘ-дің Masdar компаниясы да қатысуда.
Катар капиталы ірі ойыншылардың ізімен келуде
Сарапшылардың пікірінше, Қатардың Қазақстан экономикасына қызығушылығы кездейсоқ емес. Бұған дейін елімізге америкалық, еуропалық, қытайлық және араб инвесторлары келсе, қазір Парсы шығанағындағы қаржы институттары да Қазақстанды ұзақ мерзімді серіктес ретінде қарастыра бастады.
Қатарлық капиталдың келуі Қазақстанның халықаралық нарықтағы сенімді инвестициялық бағыт ретіндегі беделінің нығайғанын көрсетеді. Әсіресе энергетика, көлік инфрақұрылымы және агроөнеркәсіп салалары жаңа серіктестік үшін перспективалы бағыт ретінде қарастырылуда.
Жаңа инвестициялық имидж қалыптасып жатыр
Экономистердің айтуынша, Қазақстанның халықаралық аренадағы бейнесі біртіндеп өзгеріп келеді. Егер бұрын ел негізінен мұнай мен металға тәуелді шикізаттық экономика ретінде қабылданса, қазір Қазақстан көлік-логистикалық хаб, цифрлық жобалар мен жасыл энергетикаға инвестиция тартатын мемлекет ретінде таныла бастады.
UNCTAD мәліметтері бойынша, әлемдік тікелей шетелдік инвестициялар көлемі төмендеп жатқан жағдайда да Қазақстан халықаралық капитал үшін маңызды бағыт мәртебесін сақтап отыр.
Сарапшылардың бағалауынша, ірі халықаралық инвесторлардың келуі мен жаңа қаржы ағындары Қазақстанның инвестициялық имиджін күшейтіп, елдің өңірлік экономикалық орталық ретіндегі позициясын нығайтуға ықпал етуде.
