Qazaqstandyqtardyń basym bóligi nesie nemese qaryz tólep júr. Bul týraly DEMOSCOPE qoǵamdyq pikirge jedel monitoring júrgizý biýrosy júrgizgen saýalnama nátijesinde belgili boldy, dep habarlaidy dalanews.kz.
Zertteý derekterine sáikes, saýalnamaǵa qatysqandardyń 72,7 paiyzynyń qazirgi ýaqytta nesiesi nemese qaryzy bar. Onyń ishinde 39,7 paiyzynyń bir ǵana nesiesi bolsa, 33 paiyzy birneshe nesie tólep otyrǵanyn aitqan. Al respondentterdiń 27 paiyzy eshqandai nesie mindettemesi joq ekenin málimdegen.
Saýalnama nátijesi boiynsha eń kóp taralǵan qaryz túri – tutynýshylyq nesie. Qatysýshylardyń 70,4 paiyzy dál osy nesie túrin paidalanatynyn kórsetken. Sondai-aq azamattardyń 22,1 paiyzy týystary, dostary nemese tanystarynan qaryz alǵanyn aitsa, 14,4 paiyzy avtonesie tólep júrgenin, 13 paiyzy ipotekasy bar ekenin jetkizgen.
Zertteý qaryz júktemesiniń otbasylyq biýdjetke aitarlyqtai áser etetinin de kórsetti. Qaryz alýshylardyń 46,7 paiyzy ai saiynǵy tabysynyń jartysynan kóbin nesie tóleýge jumsaidy. Al 24,5 paiyzy tabysynyń tórtten birinen jartysyna deiingi bóligin nesielerin jabýǵa baǵyttaidy. Respondentterdiń 20,3 paiyzy tabysynyń tórtten bir bóligin qaryz tólemderine jumsaitynyn aitqan.
Saýalnamaǵa qatysqan 60 jastan asqan azamattardyń ár úshinshisiniń nesiesi nemese qaryzy bar ekeni anyqtalǵan. Bul kórsetkish 32,8 paiyzdy quraidy.
Aita keteiik, zertteý 2026 jylǵy 10-23 mamyr aralyǵynda júrgizilgen. Sarapshylardyń pikirinshe, alynǵan málimetter eldegi halyqtyń nesiege táýeldiligi joǵary deńgeide ekenin kórsetedi.
