Sarapshy Aibar Oljaev búgin úkimette ótken brifinke qatysty pikir bildirdi, dep habarlaidy Dalanews.kz.
Úkimettiń qandai jumys atqarylyp jatqany, bolashaqta qandai jumystar júrgiziletini jaily brifing ótkizip, qoǵamǵa habarlap turý búgin qalypty jaǵdaiǵa ainalǵandai. Bul qoǵammen dialogtyń jarqyn kórinisi, jaqsy qadam.
Qosh, búgin Úkimet basshysynyń orynbasary Roman Skliar jáne onyń baqylaýyndaǵy vedomstvo ministrleri elimizdiń óndiris, infraqurylym, energetika men investitsiialyq saiasat baǵyttary boiynsha brifing ótkizip, birqatar mańyzdy málimetterdi jariialady.
Sonymen biylǵy alǵashqy jartyjyldyqta ónerkásip óndirisinde ósim baiqaldy. Jalpy kólemi 28 trln teńgege jýyqtasa, sonyń ishinde óńdeý ónerkásibi 13 trln teńgeden astam ónim óndirgen. Ásirese, mashina jasaý, himiia, qurylys materialdary men azyq-túlik óndirisi syndy salalarda oń serpin bar.
Túrli jobalar boiynsha da damý joq emes. Jalpy somasy 1,5 trln teńgege baǵalanǵan 190 jobanyń iske asyrylýy josparlanǵan. Qazirdiń ózinde 47 joba júzege asyp, birneshe myń jumys orny qurylǵan.
Sonymen qatar avtojoldardy jóndeý men jańǵyrtý jumystary júrip jatyr, jalpy uzyndyǵy 12 myń shaqyrymdy qamtyǵan jumystardyń negizgi bóligi biyl aiaqtalýy tiis. Aviatsiia salasynda Zaisan, Katonqaraǵai jáne Kendirli óńirlerinde jańa áýejailar salyna bastady. Bul óńirlik damý men ishki týrizm úshin mańyzdy qadam.
Turǵyn úi qurylysy buryn-sońdy bolmaǵan qarqynmen júrip jatyr. Jyl sońyna deiin 19 mln sharshy metrge jýyq turǵyn úi paidalanýǵa berilýi tiis. Alǵashqy jartyjyldyqtyń ózinde 7,9 mln sharshy metri salynǵan. Úkimet qoljetimdi baspanamen qamtý jónindegi tapsyrmalardy júieli júzege asyryp jatyr dep senimdi aita alamyz.
Bul tek jarty jyl ishinde atqarylǵan ister. Úkimettiń el ekonomikasy úshin naqty qozǵalysy qarymdy, al aldaǵy josparlary myqty. Jalpy baǵyt jaman emes. Úkimettiń ár qadamy elimizdiń infraqurylymdyq, energetikalyq jáne áleýmettik áleýetin arttyrýǵa baǵyttalǵan júieli jumystyń jemisi. Endigi mindet – osy qarqynnan jańylmai, ár bastamanyń halyqqa shynaiy paidasyn jetkizý.
