ساراپشى ايبار ولجايەۆ بۇگىن ۇكىمەتتە وتكەن بريفينكە قاتىستى پىكىر ءبىلدىردى، دەپ حابارلايدى Dalanews.kz.
ۇكىمەتتىڭ قانداي جۇمىس اتقارىلىپ جاتقانى، بولاشاقتا قانداي جۇمىستار جۇرگىزىلەتىنى جايلى بريفينگ وتكىزىپ، قوعامعا حابارلاپ تۇرۋ بۇگىن قالىپتى جاعدايعا اينالعانداي. بۇل قوعاممەن ديالوگتىڭ جارقىن كورىنىسى، جاقسى قادام.
قوش، بۇگىن ۇكىمەت باسشىسىنىڭ ورىنباسارى رومان سكليار جانە ونىڭ باقىلاۋىنداعى ۆەدومستۆو مينيسترلەرى ەلىمىزدىڭ ءوندىرىس، ينفراقۇرىلىم، ەنەرگەتيكا مەن ينۆەستيسيالىق ساياسات باعىتتارى بويىنشا بريفينگ وتكىزىپ، ءبىرقاتار ماڭىزدى مالىمەتتەردى جاريالادى.
سونىمەن بيىلعى العاشقى جارتىجىلدىقتا ونەركاسىپ وندىرىسىندە ءوسىم بايقالدى. جالپى كولەمى 28 ترلن تەڭگەگە جۋىقتاسا، سونىڭ ىشىندە وڭدەۋ ونەركاسىبى 13 ترلن تەڭگەدەن استام ءونىم وندىرگەن. اسىرەسە، ماشينا جاساۋ، حيميا، قۇرىلىس ماتەريالدارى مەن ازىق-تۇلىك ءوندىرىسى سىندى سالالاردا وڭ سەرپىن بار.
ءتۇرلى جوبالار بويىنشا دا دامۋ جوق ەمەس. جالپى سوماسى 1،5 ترلن تەڭگەگە باعالانعان 190 جوبانىڭ ىسكە اسىرىلۋى جوسپارلانعان. ءقازىردىڭ وزىندە 47 جوبا جۇزەگە اسىپ، بىرنەشە مىڭ جۇمىس ورنى قۇرىلعان.
سونىمەن قاتار اۆتوجولداردى جوندەۋ مەن جاڭعىرتۋ جۇمىستارى ءجۇرىپ جاتىر، جالپى ۇزىندىعى 12 مىڭ شاقىرىمدى قامتىعان جۇمىستاردىڭ نەگىزگى بولىگى بيىل اياقتالۋى ءتيىس. اۆياسيا سالاسىندا زايسان، كاتونقاراعاي جانە كەندىرلى وڭىرلەرىندە جاڭا اۋەجايلار سالىنا باستادى. بۇل وڭىرلىك دامۋ مەن ىشكى تۋريزم ءۇشىن ماڭىزدى قادام.
تۇرعىن ءۇي قۇرىلىسى بۇرىن-سوڭدى بولماعان قارقىنمەن ءجۇرىپ جاتىر. جىل سوڭىنا دەيىن 19 ملن شارشى مەترگە جۋىق تۇرعىن ءۇي پايدالانۋعا بەرىلۋى ءتيىس. العاشقى جارتىجىلدىقتىڭ وزىندە 7،9 ملن شارشى مەترى سالىنعان. ۇكىمەت قولجەتىمدى باسپانامەن قامتۋ جونىندەگى تاپسىرمالاردى جۇيەلى جۇزەگە اسىرىپ جاتىر دەپ سەنىمدى ايتا الامىز.
بۇل تەك جارتى جىل ىشىندە اتقارىلعان ىستەر. ۇكىمەتتىڭ ەل ەكونوميكاسى ءۇشىن ناقتى قوزعالىسى قارىمدى، ال الداعى جوسپارلارى مىقتى. جالپى باعىت جامان ەمەس. ۇكىمەتتىڭ ءار قادامى ەلىمىزدىڭ ينفراقۇرىلىمدىق، ەنەرگەتيكالىق جانە الەۋمەتتىك الەۋەتىن ارتتىرۋعا باعىتتالعان جۇيەلى جۇمىستىڭ جەمىسى. ەندىگى مىندەت – وسى قارقىننان جاڭىلماي، ءار باستامانىڭ حالىققا شىنايى پايداسىن جەتكىزۋ.
