AQSh prezidenti Donald Tramp jetekshi tehnologiialyq kompaniialardyń basshylarymen kezdesip, federaldyq vedomstvolar men agenttikterge resmi qoldanystaǵy «jasandy intellekt» ataýyn «sýperintellekt» nemese SI terminimen almastyrýdy mindetteitin jarlyqqa qol qoidy, dep habarlaidy dalanews.kz.
Jańa ataý atqarýshy biliktiń zańnamalyq kúshi joq qujattarynda, resmi hat almasýda, jariia málimdemelerde, internet-saittarda, esepter men baǵdarlamalyq qujattarda qoldanylýǵa tiis. Jarlyqta tehnologiianyń mundai qarqynmen damýy «sýperintellekt dáýiriniń» bastalǵanyn bildiretini aitylǵan.
Tehnologiialardyń qaýipsizdigine kompaniialar jaýap beredi
Aq úide ótken kezdesýge OpenAI, Anthropic, Nvidia, Meta jáne Google kompaniialarynyń basshylary qatysty. Jabyq jiynnan keiin Tramp taraptardyń jasandy intellekt týdyrýy múmkin qaýip-qaterlerden qorǵanýǵa baǵyttalǵan moraldyq mindetteme týraly qujatqa qol qoiǵanyn málimdedi.
Kelisim boiynsha ár kompaniia ózi ázirlegen tehnologiianyń qaýipsizdigine jaýap beredi. Olar modelderdiń belgilengen maqsatqa sai jumys isteýin qamtamasyz etetin qorǵanys tetikterin engizip, anyqtalǵan aqaýlardy jedel túzetýge mindettendi.
Sondai-aq kompaniialar júielerdiń jumysyn baǵalaý úshin táýelsiz aýditorlarmen birlesip qyzmet atqarýy kerek. Bul tekserýler platformalardyń ózge tehnikalyq júielerdi buzyp, olarǵa zańsyz qol jetkizýine jol bermeýdi kózdeidi.
Qujatqa Donald Tramppen birge Google bas direktory Sýndar Pichai, Anthropic basshysy Dario Amodei, Meta kompaniiasynyń jetekshisi Mark Tsýkerberg, OpenAI prezidenti Greg Brokman, SpaceX basshysy Ilon Mask jáne Nvidia bas direktory Djensen Hýang qol qoiǵan.
Tramp jasandy intellekt quraldarynyń qaýipsizdigin qadaǵalaityn arnaiy keńes qurý jospary bar ekenin de aitty. Alaida onyń quramyna kimder kiretini ázirge naqtylanbady.
Derekter ortalyqtaryn kóbeitýge qoldaý bildirdi
AQSh prezidenti jasandy intellekt júielerine qajetti esepteý qýatyn qamtamasyz etetin derekter ortalyqtaryn jedel kóbeitýdi qoldaitynyn taǵy da rastady. Alaida mundai nysandardyń elektr energiiasyn kóp tutynýy jáne jergilikti turǵyndarǵa yqtimal áseri qoǵamda alańdaýshylyq týǵyzyp otyr.
NPR jáne PBS News-pen birlesip júrgizilgen Marist Poll saýalnamasyna sáikes, tirkelgen sailaýshylardyń 65 paiyzy ózderi turatyn aýdandarda derekter ortalyqtarynyń salynýyna qarsy bolǵan.
Kezdesýden keiin Nvidia basshysy Djensen Hýang mundai nysandardy «sýperintellekt fabrikalary» dep ataýdy usyndy. Onyń pikirinshe, derekter ortalyqtarynyń qurylysy AQSh ekonomikasyn qaita indýstriialandyrýǵa jáne jańa jumys oryndaryn ashýǵa múmkindik beredi.
