Quryltai depýtaty, «Ádilet» partiiasy fraktsiiasynyń múshesi Dana Medeýova meditsina qyzmetkerleriniń kásibi mártebesi men qyzmetiniń kepildikteri týraly zań qabyldaýdy usyndy, dep habarlaidy dalanews.kz.
Depýtat Premer-ministr Oljas Bektenov pen Densaýlyq saqtaý ministri Aqmaral Álnazarovaǵa depýtattyq saýal joldady. Onyń aitýynsha, dáriger mártebesin kóterý jáne meditsinalyq mamandyqtyń bedelin arttyrý densaýlyq saqtaý salasyndaǵy negizgi mindetterdiń biri bolýy kerek.
Medeýova pandemiia meditsinalyq júieniń turaqtylyǵy tek qural-jabdyq pen dári-dármekke emes, eń aldymen bilikti kadrlarǵa bailanysty ekenin kórsetkenin atap ótti. Osyǵan bailanysty dáriger mártebesin tek áleýmettik másele emes, eldiń biologiialyq jáne ulttyq qaýipsizdigi turǵysynan qaraý qajet ekenin aitty.
«Dárigerlerdiń qaýipsizdigin qatań baqylaý – bizdiń airyqsha nazarymyzda. Birinshiden, eńbekaqy tóleý júiesi ikemdi bolyp, dárigerdiń biliktiligin eskerýi jáne ony kásibine qatysy joq biýrokratiialyq mindetterden bosatýy kerek. Dáriger sheksiz esep toltyrmai, naýqasty emdeýi tiis. Ekinshiden, «dáriger» ataýy zańmen qorǵalýy kerek. Bul ataýdyń artynda meditsinalyq bilim, rastalǵan biliktilik jáne kásibi qyzmetpen ainalysý quqyǵy turýy qajet. Úshinshiden, kadr tapshylyǵyna obektivti baǵa berý mańyzdy. Jańa dárigerlerdi tartýmen qatar, qazir júiede jumys istep júrgen mamandardy saqtap qalý qajet. Tórtinshiden, ulttyq qaýipsizdikke qater tóngen jaǵdaida dárigerler jedel ári derbes áreket ete alýy kerek. Ol úshin olardyń ókilettigi naqty aiqyndalyp, kásibi sheshimderi zańmen qorǵalýy tiis. Bul jáne basqa da máseleler júieli sheshimdi talap etedi. Sondyqtan men «Meditsina qyzmetkerleriniń kásibi mártebesi men qyzmetiniń kepildikteri týraly» zań jobasyna bastamashylyq etemin», – dedi depýtat.
Medeýova mundai zań dárigerlerdiń eńbek jaǵdaiyn, kásibi quqyqtary men mindetterin júieleýge múmkindik beretinin aitty. Qoldanystaǵy zańnamada meditsina qyzmetkerleriniń mártebesi men quqyqtaryna qatysty normalar Densaýlyq kodeksinde de bekitilgen.
Depýtattyń aitýynsha, pandemiiadan alynǵan negizgi sabaqtyń biri – meditsinalyq mamandy daiarlaý uzaq ýaqytty talap etetini. Bilikti dárigerdi daiyndaýǵa shamamen on jyl qajet bolǵanymen, qolaisyz eńbek jaǵdailary daiyn mamannyń júieden ketýine ákelýi múmkin.
«Meditsinalyq qural-jabdyqtardy satyp alýǵa, dári-dármekti óndirýge nemese basqa elderden importtaýǵa bolady. Alaida elge qaýip tóngen kezde aq halatty jandarsyz biz dármensiz bolyp qalamyz. Bilikti dárigerdi daiarlaýǵa shamamen on jyl qajet. Al osal júie daiyn mamannan bir kúnde aiyrylýy múmkin. Bizdiń mindetimiz – dárigerlerdiń tómen jalaqyǵa bailanysty mamandyqtan ketpeýine jaǵdai jasaý jáne olardyń azamattarymyzdyń igiligi úshin eńbek etýin jalǵastyrýyna múmkindik berý», – dep túiindedi Dana Medeýova.
