Astana qalasynyń alty statsionarynda meditsina jumyskerleriniń qaýipsizdigin qamtamasyz etý úshin táýlik boiy qyzmet kórsetetin kúzet beketteri uiymdastyryldy. Atalǵan shara patsienttermen birge keletin adamdardyń meditsinalyq personalǵa shabýyl jasaý jaǵdailarynyń jiileýine bailanysty qabyldandy,- dep habarlaidy Dalanews.kz
Qoǵamdyq densaýlyq saqtaý basqarmasynyń habarlaýynsha, kúzetti IIM júiesine kiretin Politsiia departamenti janyndaǵy mamandandyrylǵan kúzet qyzmetiniń mamandary qamtamasyz etedi.
«Meditsina jumyskerlerin quqyqtyq turǵydan qorǵaýdy kúsheitý jáne qaýipsiz eńbek jaǵdailaryn jasaý maqsatynda Politsiia departamentimen birlesip táýlik boiy kúzet beketteri uiymdastyryldy. Politsiia qyzmetkerleri oqys oqiǵalar jii bolatyn qabyldaý bólmelerinde kezekshilik qyzmetin atqaratyn bolady.
Azamattardyń quqyqqa qaishy keletin áreketteri týyndaǵan jaǵdaida politsiia qyzmetkerleri olardyń aldyn alý úshin zań aiasynda áreket etýge quqyly. Sońǵy kezderi dárigerlerge qatysty negizsiz sipattaǵy agressiialyq jaǵdailar jiy bolady.
Dáriger aýyr jaraqat alǵan Qostanai oblysyndaǵy sońǵy rezonanstyq jaǵdai osyndai sharalardyń qajettiligin rastaidy»,– dep atap ótti Qoǵamdyq densaýlyq saqtaý basqarmasy basshysynyń orynbasary Qadyr Jarasbaev.
Búginde kúzet beketteri eresekterge arnalǵan úsh qalalyq kópsalaly aýrýhanada, №2 qalalyq balalar aýrýhanasynda jáne eki respýblikalyq klinikada uiymdastyryldy.
Jaqyn arada Politsiia departamentimen birlesip №1 jáne №3 kópsalaly balalar aýrýhanalarynda, sondai-aq qalalyq perinataldyq ortalyqta kúzet beketterin ornatý máselesi pysyqtalýda.
Meditsina jumyskerleri atalǵan bastamany qoldap, onyń qaýipsiz jáne turaqty jumys ortasyn qurýǵa yqpal etetinin atap ótti.
«Qaýipsizdik beketteri – bizdiń is júzinde qorǵalǵanymyzdyń belgisi. Qabyldaý bóliminde táýligine túrli jaraqattary bar, ártúrli jaǵdaidy basynan ótkergen 400-ge jýyq adam júginedi. Biz patsientterdiń ǵana emes, sonymen qatar olardyń týystarynyń da agressiiasyna tap bolamyz. Barlyǵy shuǵyl kómekti qajet etedi, al meditsinalyq kómek Triage suryptaý júiesi boiynsha júzege asyrylatyny eskerilmeidi. Ár patsienttiń ózindik «basymdyq dárejesi» bar. Biraq, ókinishke orai, dárigerge degen qurmet joq», – dedi №2 kópsalaly qalalyq aýrýhananyń Qabyldaý bóliminiń meńgerýshisi Mádina Tabyldyqyzy.
Qazaqstan Respýblikasynyń Prezidenti Qasym-Jomart Toqaev fizikalyq kúsh qoldanǵany jáne meditsina jumyskerlerine qatygezdikpen qaraǵany úshin jazany qatańdatýdy tapsyrǵanyn esterińizge salamyz.
