Májilis depýtaty Ashat Aimaǵambetov qazaqstandyqtarǵa zeinetaqy jinaqtaryn basqarýda kóbirek múmkindik beretin jańa normanyń Senatta maquldanǵanyn málimdedi, dep habarlaidy dalanews.kz.
Depýtattyń aitýynsha, endi azamattar zeinetaqy jinaqtarynyń 100 paiyzyn óz tańdaýy boiynsha basqarýshy investitsiialyq kompaniialarǵa bere alady. Buǵan deiin mundai múmkindik jinaqtyń tek 50 paiyzyna ǵana berilgen edi.
«Endi ár adam óz zeinetaqysyn kimge basqartý kerektigin, jaqsy tabys ákelýi úshin qalai investitsiia jasaý qajettigin ózi sheshedi. Jinaqtalǵan aqshańyzdy burynǵydai Ulttyq banktiń basqarýynda qaldyrýǵa nemese qarajatyńyzdyń 100 paiyzyn arnaiy qarjy kompaniialaryna basqarýǵa berýge bolady», – dep jazdy Aimaǵambetov Telegram arnasynda.
Onyń sózinshe, jańa norma azamattarǵa investitsiialyq strategiiany ózderi tańdaýǵa múmkindik beredi. Mysaly, zeinetaqy jinaqtaryn táýekeli joǵary ári tabysy kóbirek baǵyttarǵa nemese kerisinshe, tabysy tómendeý bolsa da turaqty qarjy quraldaryna bólýge bolady.
Depýtat basqarýshy kompaniialar azamattardyń negizgi salǵan qarajatynyń saqtalýyna kepildik beretinin atap ótti. Sondai-aq olardyń qyzmeti Ulttyq bank pen memleket tarapynan qatań baqylaýda bolady.
Aita keteiik, qazir qazaqstandyqtardyń mindetti zeinetaqy jarnalarynyń basym bóligin Ulttyq bank basqarady jáne investitsiialaidy.
