Almaty oblysynyń Kegen aýdany Qarqara jailaýynda dúiim jurt asyǵa kútken «Qymyzmuryndyq – 2026» mádeni-kópshilik jáne sporttyq sharasy bastaldy. Atalmysh mereke abyz baba Álmerek Janshyqulynyń 368 jyldyǵymen qatar kelip, biyl 5-ret uiymdastyrylyp otyr. Merekege elimizdiń túkpir-túkpirinen, Túrkiia, Ázirbaijan, Qyrǵyzstan, Qytai, Túrkmenstan, Ózbekstan, Qaraqalpaqstan Respýblikasynan qonaqtar kelýde. Qymyz toiyna barlyǵy 35 myńǵa jýyq meiman qatysady dep kútilýde, dep habarlaidy dalanews.kz.
Tań sáriden Qarqara jailaýyna jinalǵan jurtshylyq túrli baǵyttaǵy taqyryptyq alańdardy aralap kórdi. Júzden astam kiiz úiden quralǵan etnoaýylda qonaqtar qazaq halqynyń bai mádenietinen syr shertetin kórmeni tamashalady. Sonymen qatar qolóner sheberleriniń, sýretshilerdiń týyndylary usynylyp, aýyl sharýashylyǵy tehnikasy men jergilikti óndirýshilerdiń ónimderi tanystyryldy. Qolónerge qyzyǵatyn jandarǵa sheberlik saǵattary ótkizilýde. Ulttyq salt-dástúr men ádep-ǵuryptyń aishyǵy bolǵan tarihi jádigerler kórmesi de halyqtyń erekshe nazaryna ilikti.
Qymyz toiynda sondai-aq ulttyq oiyndardan túrli saiystar ótkizilip, Myńjylqy atyrabyn dúbirge bóleýde. Atap aitqanda, sportshylar at báigesi, qazaq kúresi, alyptar saiysy, teńge ilý, asyq atý, qoi kóterý syndy jarystardan synǵa túsýde.
Sonymen birge «Topjarǵan» etno-óner ortalyǵynyń shoý baǵdarlamasy, «Tolaǵai» óner ortalyǵynyń qoiylymdary, oblys ónerpazdary men tanymal estrada juldyzdarynyń kontserti qonaqtarǵa kóterińki kóńil-kúi syilaýda. Balalarǵa arnalǵan aimaqta attraktsiondar, qýyrshaq teatry, qolóner, sýret salý, shahmat jáne toǵyzqumalaq jarystary ótkizilýde. «Qymyzmuryndyqqa» kelgen kópshilik ulttyq sýsynymyz qymyzdan dám tatyp, ulttyq taǵamnan aýyz tiip, máre-sáre bolýda.
