Almaty oblysynda Memleket basshysynyń atynan óńirdegi jaǵymdy jańalyq jarshysy bolyp júrgen qos birdei mamanǵa páter kilti tabystalyp, aqparat salasyna sanaly ǵumyryn arnaǵan jýrnalister qaýymyna memlekettik nagradalar berildi. Mártebeli marapattar men baspana kiltterin oblys ákimi Marat Sultanǵaziev tabystap, BAQ ókilderin kásibi merekesimen quttyqtady, dep habarlaidy dalanews.kz.
Saltanatty rásimde «Alataý araiy» gazetiniń bas redaktory Qýanysh Tuńǵatar men «Ólke tynysy» JShS-nyń baspa qyzmetindegi úilestirýshisi Janat Toqanova baspana baqytyna keneldi. Sondai-aq ardager jýrnalist, «Ólke tynysy» JShS basshysynyń keńesshisi Kádirbek Qunypiiauly «Parasat» ordenimen, «Eńbekshiqazaq» gazetiniń tilshisi Igor Týranin «Eren eńbegi úshin» medalimen, «Alataý araiy» gazetiniń jaýapty hatshysy Sholpan Nurjaýova «Shapaǵat» medalimen marapattaldy. Sondai-aq birqatar media maman «Eńbek ardageri», «Aqparat salasynyń úzdigi», Qurmet gramotasy men Alǵys hat iegeri atandy.
Marat Eleýsizuly marapat alǵandar men jańa qonys ielerin shyn júrekten quttyqtai otyryp, bul BAQ ókilderiniń el damýyna, aqparat keńistiginiń órkendeýine qosqan eleýli úlesiniń aiqyn kórinisi ekenin aitty.
«Sizder kún saiyn el ómirindegi mańyzdy oqiǵalardy halyqqa jedel ári shynaiy jetkizip, qoǵam men memleket arasyndaǵy bailanystyń nyǵaiýyna úlken úles qosyp kelesizder. «Qalam eldi túzeidi» dep beker aitylmasa kerek. Sizderdiń kásibi biliktilikterińiz, tabandy eńbekterińiz ben azamattyq ustanymdaryńyz qoǵamnyń damýyna qyzmet etip keledi. Ult qundylyqtaryn dáriptep júrgen jýrnalisterge halyq úlken úmit artady. Osyndai qasietti de qasterli iste qalamdaryńyz muqalmasyn!
Memleket basshysy Qasym-Jomart Toqaevtyń bastamasymen jýrnalisterge kásibi mereke qarsańynda Astanadan baspana berilip júrgenin jaqsy bilesizder. Biyl bul igi bastama óńirlerde jalǵasyn tapty. Almaty oblysy da osy qatarda. Bul – sanaly ǵumyryn óńirimizdiń tynys-tirshiliginen habar taratýǵa arnap, qajyrly eńbek etip júrgen jýrnalisterge berilgen laiyqty qurmet», – degen aimaq basshysy jýrnalister qaýymy úshin taǵy da jaǵymdy jańalyqty jariia etti.
Aitýynsha, biyldan bastap «Alataý» óńirlik ipotekalyq baǵdarlamasyna «Buqaralyq aqparat quraldary» sanaty qosyldy. Endi Almaty oblysynda jumys isteitin jýrnalister osy baǵdarlamaǵa qatysa alady. Odan bólek, media salasynyń úzdikterin yntalandyrý maqsatynda óńirimizde jyl saiyn «Samǵaý» media syilyǵy uiymdastyrylyp keledi. Biyl da jyl sońynda «Samǵaýdyń» jeńimpazdary marapattalady. Osy joly «Taza Qazaqstan», «Zań men tártip» taqyrybynda jazylǵan úzdik maqala, telesiýjet jáne beinerolikterge basymdyq beriledi. Sondai-aq oblystyń áleýmettik-ekonomikalyq damýyn keńinen nasihattaýǵa atsalysqan jýrnalister de nazardan tys qalmaidy.
Kásibi mereke qarsańynda sý jańa páter iesi atanǵan Qýanysh Tuńǵatar baspanaly bolý árbir jýrnalistiń, árbir mamannyń armany ekenin aityp, sol armandy oryndaǵan Prezidentke, oblys ákimdigine alǵysyn aitty.
«Qazaq jýrnalistikasynyń jolbarysy atanǵan Sherhan Murtazanyń «Jýrnalistiń arqalaǵany alǵys, jegeni jantaq» deitini bar. Búgin bul támsildi ózgertýge týra kelip turǵandai. Óitkeni bir jylda 365 kún bolsa, tilshiler onyń 364 kúnin ózgeniń jyryn jyrlap, muńyn muńdap, múddesin qorǵaýmen ótkizedi. Sonyń ishinde bir kún, iaǵni Buqaralyq aqparat quraldary qyzmetkerleri kúninde barsha tilshiler qaýymynyń mereii tasyp, arqalanyp qalatyny bar. Almaty oblysy Prezidenttiń Jarlyǵymen ekige bólinip, oblys ortalyǵy Qonaev qalasyna kóshirilgennen bergi tórt jyl ýaqytta alǵash ret BAQ ókilderine baspana berilip tur. Bul eń aldymen Memleket basshysynyń, odan keiin oblys ákimdiginiń nátijeli jumysynyń jemisi», – dedi Qýanysh Abaibekuly.
Halyq pen bilik arasynda altyn kópir bolyp, el múddesin bárinen biik qoiǵan jýrnalisterdiń eńbegi árqashan qurmetke laiyq. Al Almaty oblysyndaǵy BAQ ókilderiniń qýanyshy munymen shektelmeidi. Joǵaryda atap ótkendei, endi olar «Alataý» óńirlik ipotekalyq baǵdarlamasyna qatysyp, baspanaly bola alady. Sondyqtan jýrnalister qaýymyn qýanyshqa bóleitin jaǵymdy jańalyqtar legi áli de jalǵasatyn bolady.
