Qazaqstanda 2023 jyldyń 3 naýryzynan bastap halyqtyń qaryzdyq júktemesin azaıtýǵa baǵyttalǵan «QR azamattarynyń tólem qabilettiligin qalpyna keltirý jáne bankrottyǵy týraly» Zań kúshine endi. Onyń SHQO-da iske asyrylýy týraly SHQO boıynsha Memlekettik kirister Departamenti basshysynyń orynbasary Qazybek Qoıshınov Óńirlik komýnıkasıalar qyzmeti alańynda málimdedi,– dep habarlaıdy Dalanews.kz
Qazybek Qoıshınovtyń aıtýynsha, zań kúshine engen sátten bastap oblysta sottan tys bankrottyq rásimine 5 927 ótinish túsken. Onyń ishinde 651 azamat bankrot dep tanylyp, 4 145 ótinishke bas tartylǵan.
Sot arqyly bankrottyq rásimine 91 ótinish berilgen: 22 adam bankrot dep tanyldy, 15 is boıynsha rásim jalǵasýda, qalǵan ótinishter qaraýsyz qaldyrylǵan nemese keri qaıtarylǵan. Tólem qabilettiligin qalpyna keltirý rásimin 19 turǵyn tańdaǵan - onyń ishinde 8 is boıynsha qaryzdardy qaıta qurylymdaý jospary bekitildi.
Zańda úsh túrli rásim qarastyrylǵan:
* Sottan tys bankrottyq – qaryz mólsheri 1 600 AEK-ke deıin bolǵan jaǵdaıda, 12 aı ishinde tólem júrgizilmese jáne tirkelgen múlik bolmaǵan kezde qoldanylady. Ótinishter Egov portaly nemese HQKO arqyly beriledi. Rásim alty aıǵa deıin sozylady.
* Sot bankrottyǵy – qaryz mólsheri 1 600 AEK-ten asqan jaǵdaıda júrgiziledi. Bul rásim qarjy basqarýshysynyń qatysýymen ótedi. Jalǵyz baspana kepilde bolmasa, azamattyń ózinde qalady.
* Tólem qabilettiligin qalpyna keltirý – bankrot dep tanylmaı, qaryzdardy bes jylǵa deıin bólip tóleýdi kózdeıdi.
Qazybek Qoıshınov atap ótkendeı, bankrot dep tanylǵan azamattar bes jyl ishinde jańa nesıe rásimdeı almaıdy. Qaıta bankrottyq rásimi tek jeti jyldan keıin múmkin bolady. Sonymen qatar alıment, densaýlyqqa keltirilgen zıandy óteý jáne qylmystyq aıyppuldar boıynsha mindettemeler joıylmaıdy.
Keńes alý úshin óńir turǵyndary Óskemen qalasy, Permıtın kóshesi, 27-úı, 108-kabınet mekenjaıyndaǵy MKD-ǵa júgine alady nemese 8 (7232) 70-15-58, 24-25-62 telefondary arqyly habarlasa alady.
