Nursultan Nazarbaev týraly birneshe fılm túsirilgen. Bul fılmderge el qazynasynan qomaqty qarjy bólingen. Jalpy esep boıynsha Nazarbaevtyń ómir jolyn baıandaıtyn fılmderge 14,2 mln AQSH dollary jumsalǵan, - dep habarlaıdy Dalanews.kz "Kýrsıv" basylymyna siltep.
- "Balalyq shaǵymnyń aspany"
Nazarbaev jaıly shyqqan alǵashqy fılm 2011 jyly 14 sáýirde jaryq kórdi. Ashyq derekkózde bul fılmge 3 mln dollar (qazirgi kýrspen alǵanda 1 mlrd 543 mln teńge) bólingeni aıtylady.
Rejıser Rústem Ábdiráshev túsirgen "Balalyq shaǵymnyń aspany" – Nursultan Nazarbaevtyń balalyq shaǵy týraly baıandaıtyn kórkem fılm. Oqıǵalar negizinen tuńǵysh prezıdenttiń týǵan jeri Shamalǵan aýylynda ótedi.
- "Elbasy joly"
Búdjeti 2 500 000 dollar (1 mlrd 286 mln teńge) delinedi. Kasalyq túsim: 175 199 dollar. Rejıseri: Rústem Ábdirashev
Bul fılm Nursultan Nazarbaevtyń Temirtaýdaǵy qarapaıym jumysshy bolǵan jyldaryn sýretteıdi. Týyndyda Nazarbaev metalýrgıa kombınatynda jumys istep júrip, óziniń kóshbasshylyq qasıetterin kórsetedi.
- "Tyǵyryqtan jol tapqan"
Shyǵý ýaqyty: 4 jeltoqsan 2014 jyl. Búdjet: 2 500 000 dollar (1 mlrd 286 mln teńge). Kasalyq túsim: 99 228 dollar (51 mln teńge). Rejıseri: Rústem Ábdirashev
Fılmde Nursultan Nazarbaevtyń saıası arenaǵa qadam basýy, 1980-shi jyldardaǵy Qazaqstandaǵy qoǵamdyq-saıası ózgerister kezeńi beınelengen.
- "Juldyzdar toǵysqanda"
Shyǵý ýaqyty: 28 sáýir 2016 jyl. Búdjet: 3 600 000 dollar (1 mlrd 852 mln teńge). Kasalyq túsim: 54 367 dollar (27 mln teńge). Rejıseri: Sergeı Snejkın
Alǵashqy úsh fılmniń rejıseri Rústem Ábdirashev bolsa, bul fılmdi rejıser Sergeı Snejkın túsirdi. Týyndy 1984–1991 jyldar aralyǵyndaǵy mańyzdy saıası oqıǵalardy qamtıdy. Nazarbaevtyń Qazaq KSR Mınıstrler Keńesiniń tóraǵasy bolyp taǵaıyndalýynan bastap, táýelsiz Qazaqstan Respýblıkasynyń Prezıdenti bolyp saılanǵanǵa deıingi aralyqty kórsetedi.
- "Elbasy joly. Astana"
Shyǵý ýaqyty: 16 jeltoqsan 2018 jyl. Búdjet: 2 600 000 dollar. Kasalyq túsim: 48 477 dollar. Rejıseri: Aqan Sataev
Fılm Qazaqstannyń jańa astanasyn kóshirý týraly sheshim qabyldaǵan kezeńge arnalǵan. Nazarbaevtyń elorda salý ıdeıasyn júzege asyrý jolyndaǵy qıyndyqtary, qarsylyqtar men syndarǵa tótep berýi sýretteledi.
Basylym málimetinshe, Nazarbaev túsirilgen barlyq bes fılmge jalpy alǵanda 14,2 mln dollar (7 mlrd 203 mln teńge) bólinse, kasalyq tabysy bar joǵy 624 897 dollar (321 mln teńge) bolǵan.
