Qazaqstanda telefon arqyly jasalatyn alaiaqtyq jaǵdailary jiilep ketti. Bul týraly «Memlekettik tehnikalyq qyzmet» mamandary habarlady, dep habarlaidy Dalanews.kz.
Sarapshylar alaiaqtardyń áreket etý tásilderin zerttei kele, olardyń resmi mekemelerdiń atyn jamylyp, túrli shemalar arqyly azamattardyń jeke derekterine jáne memlekettik qosymshalardaǵy akkaýnttaryna qol jetkizýge tyrysatynyn anyqtady. Olar emhanalar, kommýnaldyq qyzmetter jáne jetkizý kompaniialary siiaqty uiymdardyń atyn paidalanady.
Alaiaqtyqtyń negizgi tásilderi
1. Emhana tirkeý qyzmeti atynan qońyraý shalý
Alaiaqtar shynaiy emhanalardyń qyzmetkerleri bolyp tanysyp, naqty mekenjai men ataýlardy aityp senim uialatýǵa tyrysady. Olar belgili bir kúnnen bastap dárigerge jazylý nemese jedel járdem shaqyrý úshin JSN emes, arnaiy «meditsinalyq deklaratsiia nómiri» qajet ekenin aitady. Shyn máninde, olar suratqan «deklaratsiia nómiri» azamattyń DamuMed nemese eGov siiaqty qosymshalarǵa kirýine arnalǵan bir rettik SMS-kod bolyp tabylady. Bul kodty alǵan soń, olar alty tańbaly sandy aityp berýińizdi surap, jeke akkaýntyńyzdy iemdenýge múmkindik alady.
2. Kommýnaldyq qyzmet atynan eseptegishterdi tekserý
Ózderin «Astana Energosbyt», «Almaty Sý» jáne basqa kommýnaldyq uiymdardyń qyzmetkerleri retinde tanystyrǵan alaiaqtar, eseptegishterdi aýystyrýǵa arnalǵan memlekettik baǵdarlama týraly aityp, qashan sońǵy ret eseptegish aýystyrylǵanyn suraidy. Keiin ótinim ashylǵanyn syltaýratyp, sizge telefon arqyly kod jiberip, ony aityp berýińizdi suraidy. Bul qadam arqyly olar da sizdiń elektrondy júielerdegi málimetterińizge qol jetkizýge umtylady.
3. Memlekettik mekemeden kelgen hat týraly habarlama
«Qazposhta» nemese kýrerlik qyzmet qyzmetkerleri retinde bailanys ornatqan alaiaqtar, salyq komiteti, Qarjy monitoringi agenttigi nemese HQKO siiaqty mekemelerden sizge tapsyrys hat kelgenin habarlaidy. Olar mekenjaidy naqtylap, 1414 nemese 1412 siiaqty nómirlerden SMS-habarlama jiberip, ishindegi kodty aitýyńyzdy nemese silteme arqyly ótýdi suraidy. Bul — derekterdi urlaý nemese ziiandy baǵdarlama ornatý maqsatynda jasalatyn qadam.
Sarapshylardyń eskertýi
«Memlekettik tehnikalyq qyzmet» mamandarynyń aitýynsha, alaiaqtar azamattardyń aty-jóni men mekenjaiyn bilip, senimge kirgisi keledi. Alaida resmi memlekettik nemese kommýnaldyq mekemeler eshqashan telefon arqyly SMS-kodty nemese messendjerdegi siltemeni suramaidy.
Qaýipsizdik boiynsha keńester:
SMS arqyly kelgen rastaý kodtaryn bógde adamdarǵa eshqashan bermeńiz — tipti olar memlekettik organ ókili retinde tanystyrsa da;
Telefon arqyly jeke sáikestendirý nómiri (JSN) jáne basqa jeke málimetterdi aitpańyz;
Beitanys adamdar jibergen SMS-tegi siltemelerge ótpeńiz;
Kúmándi qońyraýlardy toqtatyp, uiymnyń resmi nómirine ózińiz habarlasyńyz;
Kúdikti qońyraýlar týraly dereý quqyq qorǵaý organdaryna habarlańyz.
