Búgin Sherzat isi boiynsha sot protsessinde ekinshi kýáger — Dana Jaqsykeldiden de jaýap alyndy. Ol qaiǵyly oqiǵa bolǵan túndi egjei-tegjeili baiandap berdi. Kýáger birqatar sottalýshyny tanitynyn da jasyrmady, dep habarlaidy Dalanews.kz.
Onyń aitýynsha, ekinshi kýáger Elmira Nurbekova ekeýin sol túni Sakiev Ravil dámhanaǵa shaqyrǵan.
"4 qazanǵa qaraǵan túni Ravil bizdi — Elmira ekeýmizdi "Eiforiia" kafesine shaqyrdy. Sol jerge birge bardyq. Kafeniń aldynda Abzal, Nurqiias jáne Ravil úsheýi qarsy aldy. Amandasyp, ishke kirdik. Dastarhanǵa jaiǵasyp, keiin bi alańyna shyqtyq. Uldar ústelde qalǵan bolatyn. Birazdan soń olardyń janyna Nurbol esimdi jigit qosyldy, biraq kóp uzamai ketip qaldy. Kafe saǵat 00:00-de jabylatynyna bailanysty bárimiz syrtqa shyqtyq. Sol sátte Nurqiias bizge: "Qyzdar, aparyp tastaiyq", — dedi. Sóitip, Nurqiias, Ravil, men jáne Elmira Mercedes-Benz W140 kóligine otyrdyq. Rólde Shyńǵys boldy, al janynda Azamat otyrdy", — dedi Dana Jaqsykeldi.
Jolda bir dúkenge soqpaq bolǵan. Qamajai dúkenine kelgen kezde kólikten túsip, temeki almaq bolyp kirgen.
"Dúkenniń aldynda bir top jigit turdy. Nurqiias pen basqalary sóilespek bolyp kólikten tústi. Biz Elmira ekeýimiz 1-2 minýttan soń dúkenge kirdik. Temeki suradyq, biraq satpady. Dúkennen men birinshi, artymnan Elmira shyqty", — deidi kýáger.
Dúkennen shyqqan bette tóbeles bastalyp ketken.
"Bireý jerge qulaǵandai boldy. Men "júrińder, qaitaiyq!" dep aiǵailadym da, kóliktiń artyna qarai kettim. Qasymda Ravil turǵan siiaqty. Sol sátte saqaldy, boiy uzyn, sur kiimdi bir jigit myltyqpen aspanǵa oq atty, artynan bizge qarata taǵy eki ret atty. Tóbeles keiin kósheniń arǵy betine aýysty. Men kólikte shamamen 5 minýttai otyrdym. Keiin qaita shyǵyp, "qaitaiyq" dep aiǵailadym, biraq eshkim estimedi. Qorqyp kóliktiń ishine qaita kirip kettim. Óz basym úshin qoryqtym. Myltyqty alǵash ret kórdim, atylǵan daýsyn da alǵash estidim. Tóbelesti kim bastaǵanyn bilmeimin, tek balaǵat sózder aitylǵanyn estidim. Artymda turǵan kezde Elmiranyń Ravildi ustap turǵanyn kórdim. Odan ári ne bolǵanyn bilmeimin", — dep túsindirdi ol.
Tóbeles aiaqtalǵan soń olar taǵy bir dúkenge soqqan.
"Kólikke mingen soń bári keldi. Jolai taǵy "Tri semerki" dúkenine kirdik. Shyńǵys, Nurqiias jáne Elmira dúkenge bardy. Elmira energetikalyq sýsyn alyp shyqty. Sodan keiin Abzal kóliktiń kapotyndaǵy sýsyndy surap aldy. Sol kezde onyń qolynda pyshaq bolǵanyn baiqadym, basynda baiqamadym. Energetikalyq sýsyndy quiyp jatqanda ǵana pyshaqtyń júzin kórdim. Ne úshin jýyp júrgenin túsinbedim. Temeki de alyp shyqty. Al kólikte kele jatqanda, aldyńǵy oryndyqta myltyq jatqanyn baiqadym. Sodan keiin Rysqulov aýylyna qarai bet aldyq. Jolda bir jerde toqtap, Shyńǵys kólikten myltyq pen pyshaqty alyp túsip, bes minýttan soń qolynda eshteńe joq qaityp keldi", — dedi kýáger.
Bettestirý kezinde Shynasyl Abzal pyshaqty saýsaq izderin ketirý úshin jýǵanyn moiyndaǵan.
Dana Jaqsykeldi nege jedel járdem men politsiia shaqyrmaǵanyn da túsindirdi.
"Ondai jaǵdaiǵa tap bolamyn dep oilamadym. Telefonym ózimde bolǵan, biraq qýaty bitip qaldy ma, naqty esimde joq. Óz ómirim úshin qoryqtym. Myltyqtyń atylǵan daýsyn estigende, qorqynyshtan ne isterimdi bilmei qaldym", — deidi ol.
Sondai-aq kýáger Sherzattyń anasynyń "jedel járdem shaqyryńdarshy" degen sózin estimegenin jáne ony eki adam ustap turǵanyn kórmegenin aitty.
