بۇگىن شەرزات ءىسى بويىنشا سوت پروسەسسىندە ەكىنشى كۋاگەر — دانا جاقسىكەلدىدەن دە جاۋاپ الىندى. ول قايعىلى وقيعا بولعان ءتۇندى ەگجەي-تەگجەيلى بايانداپ بەردى. كۋاگەر ءبىرقاتار سوتتالۋشىنى تانيتىنىن دا جاسىرمادى، دەپ حابارلايدى Dalanews.kz.

ونىڭ ايتۋىنشا، ەكىنشى كۋاگەر ەلميرا نۇربەكوۆا ەكەۋىن سول ءتۇنى ساكييەۆ راۆيل ءدامحاناعا شاقىرعان.

"4 قازانعا قاراعان ءتۇنى راۆيل ءبىزدى — ەلميرا ەكەۋمىزدى "ەيفوريا" كافەسىنە شاقىردى. سول جەرگە بىرگە باردىق. كافەنىڭ الدىندا ابزال، نۇرقياس جانە راۆيل ۇشەۋى قارسى الدى. امانداسىپ، ىشكە كىردىك. داستارحانعا جايعاسىپ، كەيىن بي الاڭىنا شىقتىق. ۇلدار ۇستەلدە قالعان بولاتىن. ءبىرازدان سوڭ ولاردىڭ جانىنا نۇربول ەسىمدى جىگىت قوسىلدى، ءبىراق كوپ ۇزاماي كەتىپ قالدى. كافە ساعات 00:00-دە جابىلاتىنىنا بايلانىستى ءبارىمىز سىرتقا شىقتىق. سول ساتتە نۇرقياس بىزگە: "قىزدار، اپارىپ تاستايىق"، — دەدى. ءسويتىپ، نۇرقياس، راۆيل، مەن جانە ەلميرا Mercedes-Benz W140 كولىگىنە وتىردىق. رولدە شىڭعىس بولدى، ال جانىندا ازامات وتىردى"، — دەدى دانا جاقسىكەلدى.

جولدا ءبىر دۇكەنگە سوقپاق بولعان. قاماجاي دۇكەنىنە كەلگەن كەزدە كولىكتەن ءتۇسىپ، تەمەكى الماق بولىپ كىرگەن.

"دۇكەننىڭ الدىندا ءبىر توپ جىگىت تۇردى. نۇرقياس پەن باسقالارى سويلەسپەك بولىپ كولىكتەن ءتۇستى. ءبىز ەلميرا ەكەۋىمىز 1-2 مينۋتتان سوڭ دۇكەنگە كىردىك. تەمەكى سۇرادىق، ءبىراق ساتپادى. دۇكەننەن مەن ءبىرىنشى، ارتىمنان ەلميرا شىقتى"، — دەيدى كۋاگەر.

دۇكەننەن شىققان بەتتە توبەلەس باستالىپ كەتكەن.

"بىرەۋ جەرگە قۇلاعانداي بولدى. مەن "جۇرىڭدەر، قايتايىق!" دەپ ايعايلادىم دا، كولىكتىڭ ارتىنا قاراي كەتتىم. قاسىمدا راۆيل تۇرعان سياقتى. سول ساتتە ساقالدى، بويى ۇزىن، سۇر كيىمدى ءبىر جىگىت مىلتىقپەن اسپانعا وق اتتى، ارتىنان بىزگە قاراتا تاعى ەكى رەت اتتى. توبەلەس كەيىن كوشەنىڭ ارعى بەتىنە اۋىستى. مەن كولىكتە شامامەن 5 مينۋتتاي وتىردىم. كەيىن قايتا شىعىپ، "قايتايىق" دەپ ايعايلادىم، ءبىراق ەشكىم ەستىمەدى. قورقىپ كولىكتىڭ ىشىنە قايتا كىرىپ كەتتىم. ءوز باسىم ءۇشىن قورىقتىم. مىلتىقتى العاش رەت كوردىم، اتىلعان داۋسىن دا العاش ەستىدىم. توبەلەستى كىم باستاعانىن بىلمەيمىن، تەك بالاعات سوزدەر ايتىلعانىن ەستىدىم. ارتىمدا تۇرعان كەزدە ەلميرانىڭ ءراۆيلدى ۇستاپ تۇرعانىن كوردىم. ودان ءارى نە بولعانىن بىلمەيمىن"، — دەپ ءتۇسىندىردى ول.

توبەلەس اياقتالعان سوڭ ولار تاعى ءبىر دۇكەنگە سوققان.

"كولىككە مىنگەن سوڭ ءبارى كەلدى. جولاي تاعى "تري سەمەركي" دۇكەنىنە كىردىك. شىڭعىس، نۇرقياس جانە ەلميرا دۇكەنگە باردى. ەلميرا ەنەرگەتيكالىق سۋسىن الىپ شىقتى. سودان كەيىن ابزال كولىكتىڭ كاپوتىنداعى سۋسىندى سۇراپ الدى. سول كەزدە ونىڭ قولىندا پىشاق بولعانىن بايقادىم، باسىندا بايقامادىم. ەنەرگەتيكالىق سۋسىندى قۇيىپ جاتقاندا عانا پىشاقتىڭ ءجۇزىن كوردىم. نە ءۇشىن جۋىپ جۇرگەنىن تۇسىنبەدىم. تەمەكى دە الىپ شىقتى. ال كولىكتە كەلە جاتقاندا، الدىڭعى ورىندىقتا مىلتىق جاتقانىن بايقادىم. سودان كەيىن رىسقۇلوۆ اۋىلىنا قاراي بەت الدىق. جولدا ءبىر جەردە توقتاپ، شىڭعىس كولىكتەن مىلتىق پەن پىشاقتى الىپ ءتۇسىپ، بەس مينۋتتان سوڭ قولىندا ەشتەڭە جوق قايتىپ كەلدى"، — دەدى كۋاگەر.

بەتتەستىرۋ كەزىندە شىناسىل ابزال پىشاقتى ساۋساق ىزدەرىن كەتىرۋ ءۇشىن جۋعانىن مويىنداعان.

دانا جاقسىكەلدى نەگە جەدەل جاردەم مەن پوليسيا شاقىرماعانىن دا ءتۇسىندىردى.

"ونداي جاعدايعا تاپ بولامىن دەپ ويلامادىم. تەلەفونىم وزىمدە بولعان، ءبىراق قۋاتى ءبىتىپ قالدى ما، ناقتى ەسىمدە جوق. ءوز ءومىرىم ءۇشىن قورىقتىم. مىلتىقتىڭ اتىلعان داۋسىن ەستىگەندە، قورقىنىشتان نە ىستەرىمدى بىلمەي قالدىم"، — دەيدى ول.

سونداي-اق كۋاگەر شەرزاتتىڭ اناسىنىڭ "جەدەل جاردەم شاقىرىڭدارشى" دەگەن ءسوزىن ەستىمەگەنىن جانە ونى ەكى ادام ۇستاپ تۇرعانىن كورمەگەنىن ايتتى.