Búgin Jetisý oblysynyń qylmystyq ister jónindegi mamandandyrylǵan aýdanaralyq sotynda Sherzat Bolat isi boıynsha sot talqylaýy jalǵasady, dep habarlaıdy Dalanews.kz.
İsti sýdıa Erjan Januzaqov júrgizip jatyr. Memlekettik aıyptaýshylar – Erjan Quraqbaev pen Dana Sársenbaı. Aıyptalýshylar ornynda toǵyz adam otyr, olardyń biri – kámeletke tolmaǵan.
Eske salaıyq, byltyr Talǵarda jappaı tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boıynsha Almaty oblysynyń Polısıa departamenti qylmystyq is qozǵady. Sondaı-aq, olardyń úıi órtenip ketti.
Kóp uzamaı, ıaǵnı 9 jeltoqsanda marqum Sherzat Bolattyń aǵasy Nurǵanat Ǵaıypbaev ajal qushty. Polısıa departamenti aldyn ala derekter boıynsha ol sýısıd jasaǵanyn málimdedi. Oǵan dálel retinde polıseıler Nurǵanattyń týysyna messendjer arqyly jazǵan hatyn jarıa etti.
Al marqum Sherzattyń ákesi baýyry Nurǵanat Ǵaıypbaevty jer qoınyna tapsyrǵanan keıin buqaralyq aqparat quraldarymen kezdesýdi talap etip, kóshege shyqty. Alaıda araǵa uzaq ýaqyt salmaı Qarjaýbaı Nurymovty polısıa qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keıin Qarjaýbaı Nurymov 15 táýlikke ákimshilik qamaýǵa alyndy.
Aıta keteıik, atalǵan is boıynsha barlyǵy 9 adam aıyptalýda:
– Abzal Shynasyl — QR Qylmystyq kodeksiniń 293-baby 3-bóligi («Buzaqylyq»), 99-baby 2-bóligi 4 jáne 5-tarmaqtary («Asa qatigezdikpen qasaqana kisi óltirý»), sondaı-aq 24-baptyń 3-bóligi («Qylmysqa daıyndalý jáne oqtalý») boıynsha;
– Ravıl Sakıev — 293-bap 3-bóligi jáne 99-bap 2-bóligi 7 jáne 9-tarmaqtary boıynsha («Buzaqylyq», «Asa qatigezdikpen qasaqana kisi óltirý»);
– Shyńǵys Belqojaev, Darhan Askentaı, Nurqıas İlıasov, Nurbol Toqtaýbaev, Dıdar Ǵalıahmet, Azamat Toqtaýbaev — 293-bap 3-bóligi boıynsha («Buzaqylyq»);
– Dýman Ysqaq — 434-bap («Qylmys týraly habarlamaý») boıynsha jaýapqa tartylýda.
Sot otyrysy ashyq formatta ótip jatyr. Prosestiń tikeleı translásıasy Joǵarǵy Sottyń resmı YouTube arnasynda júrgizilýde.
Málimetterge súıensek, sot aldyna kelgen aıyptalýshylardyń tórteýi buryn da qylmystyq jaýapkershilikke tartylǵan bolyp shyqty.
Atap aıtqanda, Ravıl Sakıev 2021 jyly 2 jyl 6 aıǵa bas bostandyǵynan aıyrylǵan, Shyńǵys Belqojaev 2015 jyly bas bostandyǵyn shekteý jazasyna kesilgen, Nurqıas İlıasov – 2 jyl 6 aı merzimge bas bostandyǵyn shekteý jazasyn alǵan. Al Azamat Toqtaýbaev 2024 jyly 7 jylǵa sottalǵan. Aıyptalýshylardyń ekeýi — adam densaýlyǵyna qasaqana aýyr zıan keltirgeni úshin jaýapqa tartylǵan.
