بۇگىن جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا شەرزات بولات ءىسى بويىنشا سوت تالقىلاۋى جالعاسادى، دەپ حابارلايدى Dalanews.kz.
ءىستى سۋديا ەرجان جانۇزاقوۆ جۇرگىزىپ جاتىر. مەملەكەتتىك ايىپتاۋشىلار – ەرجان قۇراقبايەۆ پەن دانا سارسەنباي. ايىپتالۋشىلار ورنىندا توعىز ادام وتىر، ولاردىڭ ءبىرى – كامەلەتكە تولماعان.
ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.
كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.
كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى.
ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعانان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.
ايتا كەتەيىك، اتالعان ءىس بويىنشا بارلىعى 9 ادام ايىپتالۋدا:
– ابزال شىناسىل — ق ر قىلمىستىق كودەكسىنىڭ 293-بابى 3-بولىگى («بۇزاقىلىق»)، 99-بابى 2-بولىگى 4 جانە 5-تارماقتارى («اسا قاتىگەزدىكپەن قاساقانا كىسى ءولتىرۋ»)، سونداي-اق 24-باپتىڭ 3-بولىگى («قىلمىسقا دايىندالۋ جانە وقتالۋ») بويىنشا؛
– راۆيل ساكييەۆ — 293-باپ 3-بولىگى جانە 99-باپ 2-بولىگى 7 جانە 9-تارماقتارى بويىنشا («بۇزاقىلىق»، «اسا قاتىگەزدىكپەن قاساقانا كىسى ءولتىرۋ»)؛
– شىڭعىس بەلقوجايەۆ، دارحان اسكەنتاي، نۇرقياس ءىلياسوۆ، نۇربول توقتاۋبايەۆ، ديدار عالياحمەت، ازامات توقتاۋبايەۆ — 293-باپ 3-بولىگى بويىنشا («بۇزاقىلىق»)؛
– دۋمان ىسقاق — 434-باپ («قىلمىس تۋرالى حابارلاماۋ») بويىنشا جاۋاپقا تارتىلۋدا.
سوت وتىرىسى اشىق فورماتتا ءوتىپ جاتىر. پروسەستىڭ تىكەلەي ترانسلياسياسى جوعارعى سوتتىڭ رەسمي YouTube ارناسىندا جۇرگىزىلۋدە.
مالىمەتتەرگە سۇيەنسەك، سوت الدىنا كەلگەن ايىپتالۋشىلاردىڭ تورتەۋى بۇرىن دا قىلمىستىق جاۋاپكەرشىلىككە تارتىلعان بولىپ شىقتى.
اتاپ ايتقاندا، راۆيل ساكييەۆ 2021 جىلى 2 جىل 6 ايعا باس بوستاندىعىنان ايىرىلعان، شىڭعىس بەلقوجايەۆ 2015 جىلى باس بوستاندىعىن شەكتەۋ جازاسىنا كەسىلگەن، نۇرقياس ءىلياسوۆ – 2 جىل 6 اي مەرزىمگە باس بوستاندىعىن شەكتەۋ جازاسىن العان. ال ازامات توقتاۋبايەۆ 2024 جىلى 7 جىلعا سوتتالعان. ايىپتالۋشىلاردىڭ ەكەۋى — ادام دەنساۋلىعىنا قاساقانا اۋىر زيان كەلتىرگەنى ءۇشىن جاۋاپقا تارتىلعان.
