Almaty oblysynyń ákimi Marat Sultanǵaziev Memleket basshysy Qasym-Jomart Toqaevqa óńirdiń 2025 jyldyń birinshi toqsanyndaǵy áleýmettik-ekonomikalyq damýy týraly esep berdi,– dep habarlaidy Dalanews.kz
Ákimniń aitýynsha, oblystyń negizgi áleýmettik-ekonomikalyq kórsetkishteri ósim qarqynyn saqtap otyr.
Atap aitqanda:
-
Ónerkásip óndirisiniń kólemi 507,9 mlrd teńgeni qurady;
-
Aýyl sharýashylyǵy ónimi 97,4 mlrd teńgege jetti;
-
Shaǵyn jáne orta biznes sýbektileriniń sany 146,2 myńǵa deiin ósip, 7,7 paiyzǵa artty.
Óndiris pen infraqurylym salasyndaǵy jobalar
Jyl basynan beri óńirde 12 jańa ónerkásip jobasy iske qosyldy. Iri jobalardyń qatarynda «GALANZ bottlers» óndiris alańynyń keńeiýi, «Bartoǵai GES-28» jáne Sharyn ózenindegi shaǵyn GES kaskadynyń qurylysy bar. Jalpy, oblysta quny 2,4 trillion teńge bolatyn 122 joba júzege asyrylyp jatyr. Bul jobalardyń nátijesinde 36 776 jańa jumys orny ashylady dep josparlanýda.
Qonaev jáne Alataý qalalaryn damytý
Qonaev qalasynda «Smart Qonaev» qalany basqarýdyń biryńǵai júiesi engizilýde. Bul joba qalanyń barlyq salalaryn tsifrlandyrýdy kózdeidi. Al Alataý qalasynyń bas josparyna túzetýler engizilip, kólik jáne injenerlik infraqurylymdy jobalaý jumystary bastaldy.
Bilim berý salasyndaǵy jańalyqtar
«Jaily mektep» ulttyq jobasy aiasynda oblysta 17 jańa mekteptiń qurylysy júrip jatyr. Sonymen birge, úsh aýysymdy oqytý máselesin sheshý úshin memleket-jekemenshik áriptestik negizinde taǵy 19 mektep salý josparlanǵan. 2025-2027 jyldary 91 mektepke kúrdeli jóndeý jumystary júrgiziledi.
Prezident tapsyrmasy
Kezdesý barysynda Qasym-Jomart Toqaev Qonaev pen Alataý qalalaryn, sondai-aq jalpy Almaty aglomeratsiiasyn damytýdyń mańyzdylyǵyn atap ótti. Memleket basshysy indýstriialyq aimaqtar men «Alatau» arnaiy ekonomikalyq aimaǵynyń áleýetin tolyq paidalaný, kommýnaldyq infraqurylymdy jańǵyrtý jáne eldi mekenderdegi joldardyń sapasyn arttyrý boiynsha naqty tapsyrmalar berdi.
