Óskemen qalasyndaǵy etnosaiabaqta «Taza Qala – Taza bolashaq» atty ekologiialyq aktsiia uiymdastyrylyp, oǵan 200-den astam jas pen qoǵamdyq uiymdardyń ókilderi qatysty. Is-shara elimizde júzege asyrylyp jatqan «Taza Qazaqstan» jalpyulttyq bastamasy aiasynda ótkizildi, dep habarlaidy dalanews.kz.
Aktsiianyń basty maqsaty – qoǵamdyq oryndardyń tazalyǵyn saqtaý mádenietin qalyptastyrý, jastardyń qorshaǵan ortaǵa degen jaýapkershiligin arttyrý jáne turǵyndardy ortaq iske jumyldyrý. Sońǵy jyldary óńirde ekologiialyq bastamalarǵa jastardyń qyzyǵýshylyǵy artyp, olardyń qoǵamdyq jumystarǵa belsendi qatysýy jaqsy úrdiske ainalyp keledi.
Uiymdastyrýshylardyń aitýynsha, mundai sharalar tek aýmaqtardy tazartýmen shektelmei, turǵyndardyń ekologiialyq saýattylyǵyn arttyrýǵa jáne tabiǵatqa janashyrlyq kózqarasty qalyptastyrýǵa yqpal etedi.
Óskemen qalalyq jastar resýrstyq ortalyǵynyń qyzmetkeri Nurzat Sembaevanyń aitýynsha, aktsiianyń negizgi mindeti – «Jasyl el» eńbek jasaǵynyń músheleri men qala turǵyndaryn ortaq maqsatqa biriktirip, tazalyq mádenietin keńinen nasihattaý.
– Búgingi senbilikke 200-den astam adam qatysyp otyr. «Jasyl el» baǵdarlamasy aiasynda qalaǵa 150-den astam kvota bólinip, jastar úsh ai boiy kezeń-kezeńimen eńbekke tartylýda. Bul bastama olardyń azamattyq belsendiligin arttyrýǵa múmkindik beredi, – dedi ol.
Shara barysynda etnosaiabaq aýmaǵynda tazalyq jáne abattandyrý jumystary júrgizildi. Qatysýshylar qoqys jinap, qoǵamdyq keńistiktiń kórkin jaqsartýǵa óz úlesterin qosty.
Qoǵamdyq uiym ókili Shynar Boranǵalieva mundai bastamalardyń qoǵam úshin mańyzdylyǵyna toqtaldy.
– «Taza Qazaqstan» jobasy naqty áreketke negizdelgen mańyzdy bastama. Osyndai sharalar adamdardyń tabiǵatqa jáne qoǵamdyq keńistikke degen jaýapkershiligin arttyrady, – dedi ol.
«Taza Qala – Taza bolashaq» aktsiiasy jastardyń ekologiialyq mádenietin qalyptastyryp qana qoimai, qoǵamnyń qorshaǵan ortany qorǵaý isine belsendi qatysýyna jol ashady. Senbilik qorytyndysynda etnosaiabaq aýmaǵy retke keltirilip, turǵyndar men qala qonaqtary úshin qolaily ári taza orta qalyptastyrýǵa úles qosyldy.
