Jetisý oblysynda Balqash jaǵalaýyndaǵy týrizmdi damytý baǵytynda aýyldyq infraqurylymdy jetildirý boiynsha keshendi sharalar qabyldanýda. Atap aitqanda, Lepsi aýylynda jańa temirjol vokzalynyń qurylysy júrip jatyr, politsiia pýnktiniń ǵimaraty qaita jańǵyrtylyp, aýrýhana ǵimaratyna kúrdeli jóndeý jumystary jasalýda. Qurylys jumystarynyń barysymen jáne atqarylǵan jumystardyń nátijelerimen oblys ákimi Beibit Isabaev Sarqan aýdanyna jasaǵan jumys sapary barysynda tanysty, dep habarlaidy dalanews.kz.
Eń aldymen Beibit Isabaev jańa temirjol vokzaly salynyp jatqan qurylys alańyna bardy. Nysandy paidalanýǵa berý osy jyldyń tamyz aiyna josparlanǵan. Atalǵan nysan iske qosylǵannan keiin jolaýshylarǵa qaýipsiz ári sapaly qyzmet kórsetýge, óńirdiń kólik infraqurylymynyń damýyna oń áserin tigizedi.
Nysandy salyp jatqan merdiger uiym direktorynyń birinshi orynbasary Medet Omarhanovtyń aitýynsha, qazirgi tańda qurylys jumystarynyń 45%-y aiaqtalǵan. Irgetastyń monolitti-beton jumystary tolyq aiaqtaldy. Qazir ǵimarattyń qabyrǵalary qalanýda, al jýyq arada árleý jumystary bastalady.
- Qurylys nysanynyń jalpy aýmaǵy 617 sharshy metrdi quraidy. Vokzal ǵimaraty barlyq zamanaýi talaptarǵa sai bolady. Jobada tambýr, vestibiýl, kútý zaly, saýda alańy, balaly jolaýshylarǵa arnalǵan bólme, demalys bólmesi, sanitarlyq torap, sondai-aq birqatar ákimshilik jáne tehnikalyq bólmeler qarastyrylǵan, – dedi M. Omarhanov.
Oblys ákimi óz kezeginde nysandy belgilengen merzimde aiaqtaý úshin qurylys qarqynyn jedeldetý qajettigin aitty.
Mundaǵy politsiia pýnktiniń ǵimaraty aǵymdaǵy jóndeý jumystarynan keiin tolyqtai talapqa sai keltirilgen. Ǵimarat jóndeýden ótkizilip qana qoimai, qyzmetkerlerge qolaily bolý úshin munda ashana men demalys bólmesi ashyldy, al ekinshi qabatta kazarmalyq úlgidegi jataqhana bólmeleri jabdyqtaldy. Politsiia pýnktinde turaqty negizde 5 qyzmetker jumys isteidi. Al týristik maýsym kezinde qaýipsizdik pen qoǵamdyq tártipti qamtamasyz etý úshin jeke quram sany 25 adamǵa deiin ulǵaitylady. Sonymen qatar Lepsi aýylynda sýdaǵy qaýipsizdikti qamtamasyz etý maqsatynda táýlik boiy patrýldik qyzmet atqaratyn qutqarý bólimshesiniń 12 qyzmetkeri jumys isteidi.
Sondai-aq 30 oryndyq Lepsi aýyldyq aýrýhanasyna kúrdeli jóndeý jumystary jalǵasýda. Biylǵy jyldyń sáýir aiynda bastalǵan jumystardyń qazirgi tańda 30%-y oryndalǵan. Jóndeý jumystaryn jyl sońyna deiin aiaqtaý josparlanyp otyr.
– Bizdiń aýyldyq aýrýhanaǵa sońǵy ret jóndeý jumystary 2010 jyly júrgizilgen. Sondyqtan ǵimaratty zamanaýi talaptarǵa sai jańartý qajettiligi týyndaǵan bolatyn. Bul meditsinalyq qyzmet sapasyn arttyrý úshin óte kerek, óitkeni patsientter sany jyl saiyn artyp keledi. Ásirese týristik maýsymda Lepsige keletin qonaqtar men demalýshylar qatary kóbeiedi. Máselen, ótken jyldyń ózinde ǵana bizge 800 adam meditsinalyq kómekke júgindi. Osyǵan bailanysty týristik maýsym kezinde aýdandyq aýrýhanadan arnaiy mamandardy qosymsha jiberip otyramyz. Jaqyn ýaqytta taǵy úsh dáriger keledi, – dedi aýdandyq ortalyq aýrýhananyń direktory Altai Shulǵaýbaev.
Belgili bolǵandai, aýdandyq aýrýhana ǵimaratyna kúrdeli jóndeý júrgizilip jatqan kezde naýqastardy jergilikti emhana qabyldaýda.
Beibit Isabaev kelesi jyly osy emhana ǵimaratyna aǵymdaǵy jóndeý jumystaryn júrgizýdi tapsyrdy. Osylaisha, aýyldaǵy densaýlyq saqtaý salasynyń eki iri nysany da zaman talabyna sáikestendirilip, jergilikti turǵyndar men týrister úshin sapaly meditsinalyq qyzmetterdiń qoljetimdiligi arta túspek.
