الماتى وبلىسىنىڭ اكىمى مارات سۇلتانعازييەۆ مەملەكەت باسشىسى قاسىم-جومارت توقايەۆقا ءوڭىردىڭ 2025 جىلدىڭ ءبىرىنشى توقسانىنداعى الەۋمەتتىك-ەكونوميكالىق دامۋى تۋرالى ەسەپ بەردى،– دەپ حابارلايدى Dalanews.kz

اكىمنىڭ ايتۋىنشا، وبلىستىڭ نەگىزگى الەۋمەتتىك-ەكونوميكالىق كورسەتكىشتەرى ءوسىم قارقىنىن ساقتاپ وتىر.

اتاپ ايتقاندا:

• ونەركاسىپ ءوندىرىسىنىڭ كولەمى 507،9 ملرد تەڭگەنى قۇرادى؛

• اۋىل شارۋاشىلىعى ءونىمى 97،4 ملرد تەڭگەگە جەتتى؛

• شاعىن جانە ورتا بيزنەس سۋبەكتىلەرىنىڭ سانى 146،2 مىڭعا دەيىن ءوسىپ، 7،7 پايىزعا ارتتى.

ءوندىرىس پەن ينفراقۇرىلىم سالاسىنداعى جوبالار

جىل باسىنان بەرى وڭىردە 12 جاڭا ونەركاسىپ جوباسى ىسكە قوسىلدى. ءىرى جوبالاردىڭ قاتارىندا «GALANZ bottlers» ءوندىرىس الاڭىنىڭ كەڭەيۋى، «بارتوعاي گەس-28» جانە شارىن وزەنىندەگى شاعىن گەس كاسكادىنىڭ قۇرىلىسى بار. جالپى، وبلىستا قۇنى 2،4 تريلليون تەڭگە بولاتىن 122 جوبا جۇزەگە اسىرىلىپ جاتىر. بۇل جوبالاردىڭ ناتيجەسىندە 36 776 جاڭا جۇمىس ورنى اشىلادى دەپ جوسپارلانۋدا.

قونايەۆ جانە الاتاۋ قالالارىن دامىتۋ

قونايەۆ قالاسىندا «Smart Qonaev» قالانى باسقارۋدىڭ ءبىرىڭعاي جۇيەسى ەنگىزىلۋدە. بۇل جوبا قالانىڭ بارلىق سالالارىن سيفرلاندىرۋدى كوزدەيدى. ال الاتاۋ قالاسىنىڭ باس جوسپارىنا تۇزەتۋلەر ەنگىزىلىپ، كولىك جانە ينجەنەرلىك ينفراقۇرىلىمدى جوبالاۋ جۇمىستارى باستالدى.

ءبىلىم بەرۋ سالاسىنداعى جاڭالىقتار

«جايلى مەكتەپ» ۇلتتىق جوباسى اياسىندا وبلىستا 17 جاڭا مەكتەپتىڭ قۇرىلىسى ءجۇرىپ جاتىر. سونىمەن بىرگە، ءۇش اۋىسىمدى وقىتۋ ماسەلەسىن شەشۋ ءۇشىن مەملەكەت-جەكەمەنشىك ارىپتەستىك نەگىزىندە تاعى 19 مەكتەپ سالۋ جوسپارلانعان. 2025-2027 جىلدارى 91 مەكتەپكە كۇردەلى جوندەۋ جۇمىستارى جۇرگىزىلەدى.

پرەزيدەنت تاپسىرماسى

كەزدەسۋ بارىسىندا قاسىم-جومارت توقايەۆ قونايەۆ پەن الاتاۋ قالالارىن، سونداي-اق جالپى الماتى اگلومەراسياسىن دامىتۋدىڭ ماڭىزدىلىعىن اتاپ ءوتتى. مەملەكەت باسشىسى يندۋستريالىق ايماقتار مەن «Alatau» ارنايى ەكونوميكالىق ايماعىنىڭ الەۋەتىن تولىق پايدالانۋ، كوممۋنالدىق ينفراقۇرىلىمدى جاڭعىرتۋ جانە ەلدى مەكەندەردەگى جولداردىڭ ساپاسىن ارتتىرۋ بويىنشا ناقتى تاپسىرمالار بەردى.