Májilis depýtaty, saiasattanýshy Aidos Sarym Altynbek Sársenbaev pen Nursultan Nazarbaev arasyndaǵy qarym-qatynastyń qalai shieleniskenin ashyp aitty. Bul týraly ol Adal adam YouTube arnasynda baiadady, dep habarlaidy Dalanews.kz.
Saiasattanýshynyń aitýynsha, Nazarbaev pen Sársenbaev arasyndaǵy ala mysyq bir kúnde júgirip ótpegen.
“Bul bir sátte týyndaǵan arpalys emes. Memlekettik qyzmette júrip, uzaq jyldar boiy kúres boldy. Qolymyzdan kelmegen ister kóp edi. Bastaǵan reformalarymyzdyń aiaqsyz qalǵan kezderi de boldy”, — deidi ol.
Aidos Sarymnyń aitýynsha, biliktegi yqpaldy tulǵalar qarjy salasyn óz ýysynda ustap, reformatorlardyń jolyn kesken.
“Kedergiler kóp boldy. Máselen, televiziia salasyndaǵy reformalardy toqtatyp tastady. Barlyq qarjyny Dariǵaǵa ǵana baǵyttady. Bizdiń qolymyzdaǵy negizgi quraldardy tartyp alyp, jekeshelendirip jiberdi. Osyndai ádiletsizdikter kez kelgen ministrdiń jigerin qum qylady. Prezident sózińdi elemese, jumysyń júrmeidi ǵoi”, — dep jaýap berdi ol.
Depýtat Altynbek Sársenbaev pen Marat Tájinniń bir kezderi tandem quryp, júieniń kemshilikterine qarsy birge turǵanyn eske aldy. Alaida 2001 jyldan bastap olardyń joly ekige bólingen.
“Sol kezde Altynbek Sársenbaev pen Marat Tájinniń tandemy, iaǵni ashyq hattary kóp problemany sheshýge, kóp qaýip-qaterdiń aldyn alýǵa sebep boldy. 2001 jyldan bastap jaǵdai ózgerdi. Ekeýi eki jaqqa ketti. Bireýi elshilikke, bireýi basqa qyzmetke aýysty. Basqa adamdardy tańdai bastady”, — dep qosty ol.
Saiasattanýshy 2004 jyly Altynbek Sársenbaevtyń memlekettik qyzmetke qysqa merzimge oralǵan kezeńi týraly da aitty.
“Biz Prezident atynan Astanada 4 kún jattyq. Túrli kezdesýler ótti. Sársenbaev usynystaryn aitty: "Eger kelispeseńizder, men halyq aldyna shyǵyp, málimdeme jasaimyn" dedi. Sol kezde men barlyq telearnaǵa baryp, onyń aitqan mátinin óz qolymmen berdim. Diktorlar 4 minýt boiy mátindi esh kartinasyz oqydy. Sol arqyly Altekeń óz talabyn jetkizdi: "Men osyndai maqsatpen oraldym. Eger oryndalmasa, ketemin" dedi”, — dep eske aldy Aidos Sarym.
Onyń aitýynsha, Sársenbaevtyń sol málimdemesi sailaýǵa belgili bir ózgeris ákelgen.
“Sol kezde bir sátte 50-60 shaqty gazetti tirkep aldyq. Bul úlken jeńis boldy. Biraq sailaý ádiletti ótkende, bálkim, Qazaqstannyń tarihy basqasha jazylar ma edi”, — dedi saiasattanýshy.
Sóz sońynda Sarym ashyq qarsylastyqtyń arty qaiǵyly oqiǵamen jalǵasyn tapqanyn jetkizdi.
"At quiryǵyn kesiskennen keiin, ashyq teketires ólimge ákeldi. Menmendik eshqashan jaqsylyqqa aparmaidy", — dep túiindedi ol.
Eske salaiyq, buǵan deiin Aidos Sarym «Sadaq media» arnasyna bergen suhbatynda Altynbek Sársenbaevtyń ólimine qatysty derekter aitqan edi.
Onyń aitýynsha, Altynbektiń qazasyn Nursultan Nazarbaevpen bailanystyrýdyń qajeti joq.
"Kezinde Rysbek Sársenbaev aǵamyz emotsiiamen biraz dúnieni aityp jiberdi. Áli de aityp júr. Biraq oǵan dálel joq qoi. Ol jerde Nazarbaevtyń qulaǵy kórinýi múmkin. Biraq ádilet degen bolýy tiis qoi, jobalap, ymdap bolsa da dáleldei alǵan adam joq. Men óz basym Altynbektiń ólimin Rahat Álievke jaqyndatam. Altynbekpen jyldap aralasqan, áli kúnge deiin sol ortada júrgen biraz azamatpen aralasam. Biraq olardyń eshqaisysy da tikelei Nazarbaevtan kórip jatqan joq.
Bul Rysbektiń óziniń ustanymy, óziniń jeke pikiri. Kezinde Altynbektiń janynda júrgen, qaǵazyn jazyp berip júrgen Rysbek emes, men bolatynmyn. Men ony jaqsy bilemin", deidi Aidos Sarym.
Sondai-aq ol Altynbek Sársenbaiulynyń kezinde óte kekshil bolǵanyn aitady. Biraq ýaqyt óte kele ózgergen.
«Altynbek óte kekshil adam boldy. Kóp adamdy jek kórdi. Solardyń biri – Serik Ábdrahmanov edi. Ekinshi bir adam boldy. Ol - Baltash Tursynbaev bolatyn. Biraq ýaqyt óte kele ózgerdi, sanaly ǵumyrynda óziniń jek kóretin adamdarmen tatýlasyp, solardyń deńgeiine túsip, sóileskenin kórdim», - deidi depýtat.
