Búgin «Óner ortalyǵynda» dańqty qolbasshy Jalańtós Bahadúrdiń 450 jyldyǵyna arnalǵan «Alty Alashtyń arysy - Er Jalańtós!» atty respýblikalyq aqyndar aitysynyń ashylý saltanaty ótti, dep habarlaidy dalanews.kz.
Saltanatqa oblys ákiminiń orynbasary Meirambek Shermaǵanbet qatysty.
Respýblikalyq aitysqa Qazaqstannyń eńbek sińirgen qairatkeri, Aitys aqyndary men jyrshy-termeshilerdiń halyqaralyq odaǵynyń tóraǵasy Júrsin Erman, QR Parlamenti Senatynyń depýtaty Nurtóre Júsip, Qazaqstannyń eńbek sińirgen qairatkeri, Qazaqstan Jazýshylar odaǵynyń tóraǵasy Mereke Qulkenov, aitysker aqyn, «Altyn dombyra», memlekettik «Daryn» syilyǵynyń iegeri Bekarys Shoibekov, Mádeniet qairatkeri Kenjebai Júsip qazylyq etti.
Jyr dodasy jasandy intellekt kómegimen jasalǵan Jalańtós Bahadúr obrazyndaǵy taqyryptyq monologpen bastaldy.
Ashylý rásiminde Meirambek Zinabdinuly elimizdiń ár óńirinen jinalǵan aitysker aqyndarǵa sáttilik tiledi.
«Uly Jeńistiń 81 jyldyǵy kúni dańqty qolbasshy Jalańtós Bahadúrdiń 450 jyldyǵyna arnalǵan respýblikalyq aqyndar aitysy bastaldy.
Memleket basshysy Qasym-Jomart Kemeluly: «Tarihty bilý degenimiz – ótkenmen ómir súrý emes. Biz tarihymyzdy tereń bilý jáne odan taǵylym alý arqyly ótkenniń qateligin qaitalamaityn, Uly dalany mekendegen uly babalar jolyn laiyqty jalǵastyra alatyn urpaq tárbieleýge tiispiz», - degen bolatyn.
Jalańtós Bahadúr - Qazaq handyǵynyń syndarly kezeńinde saiasatker ári qolbasshy bolǵan, el esinde máńgi saqtalǵan biregei tulǵa.Aimaǵymyzda batyr rýhyna arnalǵan mádeni is-sharalar uiymdastyrylýda. Sonyń ishinde búgingi respýblikalyq aitystyń mańyzy erekshe. Sebebi qatysýshylardyń bári - beibit kúngi batyrlar beinesin óleńmen órip, urpaqqa rýhani tárbie sińirgen tarlandar.
Sóz – qýatty qural, aqyn - sóz qudiretin keýdeden qorytyp shyǵaryp, oi-sanaǵa quiýshy. Sondyqtan búgin erlik dańqy aspandaityn kún bolmaq. Sóz júirikterine batyr atyn asqaqtatyp, el rýhyn kóterip, kómbege súrinbei jetip, báigeli bolyńyzdar deimiz! Barshańyzǵa sáttilik tileimin!», - dedi Meirambek Zinabdinuly.
Aitys alamanynda 12 aqyn baq synady.
Qorytyndysynda Shyǵystyń aqyn qyzy Juldyzai Maratbek bas júldeni ielense, úsh dúrkin «Altyn dombyra» iegeri, jerlesimiz Muhtar Niiazov I oryndy qanjyǵasyna bailady. II oryndy Qyzyljardyń qulageri Havdolla Beiishan alsa, III oryndy qyz ben jigit aitysynyń júirigi Maqsat Aqanov pen Syrdyń talantty perzenti Meiirbek Sultanhan ózara bólisti. Al Jalańtós Bahadúr atyndaǵy arnaiy júldemen belgili aitysker aqyn Didar Qami marapattaldy.
