ءماجىلىس دەپۋتاتى، ساياساتتانۋشى ايدوس سارىم التىنبەك سارسەنبايەۆ پەن نۇرسۇلتان نازاربايەۆ اراسىنداعى قارىم-قاتىناستىڭ قالاي شيەلەنىسكەنىن اشىپ ايتتى. بۇل تۋرالى ول ادال ادام YouTube ارناسىندا بايادادى، دەپ حابارلايدى Dalanews.kz.
ساياساتتانۋشىنىڭ ايتۋىنشا، نازاربايەۆ پەن سارسەنبايەۆ اراسىنداعى الا مىسىق ءبىر كۇندە جۇگىرىپ وتپەگەن.
“بۇل ءبىر ساتتە تۋىنداعان ارپالىس ەمەس. مەملەكەتتىك قىزمەتتە ءجۇرىپ، ۇزاق جىلدار بويى كۇرەس بولدى. قولىمىزدان كەلمەگەن ىستەر كوپ ەدى. باستاعان رەفورمالارىمىزدىڭ اياقسىز قالعان كەزدەرى دە بولدى”، — دەيدى ول.
ايدوس سارىمنىڭ ايتۋىنشا، بيلىكتەگى ىقپالدى تۇلعالار قارجى سالاسىن ءوز ۋىسىندا ۇستاپ، رەفورماتورلاردىڭ جولىن كەسكەن.
“كەدەرگىلەر كوپ بولدى. ماسەلەن، تەليەۆيزيا سالاسىنداعى رەفورمالاردى توقتاتىپ تاستادى. بارلىق قارجىنى داريعاعا عانا باعىتتادى. ءبىزدىڭ قولىمىزداعى نەگىزگى قۇرالداردى تارتىپ الىپ، جەكەشەلەندىرىپ جىبەردى. وسىنداي ادىلەتسىزدىكتەر كەز كەلگەن ءمينيستردىڭ جىگەرىن قۇم قىلادى. پرەزيدەنت ءسوزىڭدى ەلەمەسە، جۇمىسىڭ جۇرمەيدى عوي”، — دەپ جاۋاپ بەردى ول.
دەپۋتات التىنبەك سارسەنبايەۆ پەن مارات ءتاجيننىڭ ءبىر كەزدەرى تاندەم قۇرىپ، جۇيەنىڭ كەمشىلىكتەرىنە قارسى بىرگە تۇرعانىن ەسكە الدى. الايدا 2001 جىلدان باستاپ ولاردىڭ جولى ەكىگە بولىنگەن.
“سول كەزدە التىنبەك سارسەنبايەۆ پەن مارات ءتاجيننىڭ تاندەمى، ياعني اشىق حاتتارى كوپ پروبلەمانى شەشۋگە، كوپ قاۋىپ-قاتەردىڭ الدىن الۋعا سەبەپ بولدى. 2001 جىلدان باستاپ جاعداي وزگەردى. ەكەۋى ەكى جاققا كەتتى. بىرەۋى ەلشىلىككە، بىرەۋى باسقا قىزمەتكە اۋىستى. باسقا ادامداردى تاڭداي باستادى”، — دەپ قوستى ول.
ساياساتتانۋشى 2004 جىلى التىنبەك سارسەنبايەۆتىڭ مەملەكەتتىك قىزمەتكە قىسقا مەرزىمگە ورالعان كەزەڭى تۋرالى دا ايتتى.
“ءبىز پرەزيدەنت اتىنان استانادا 4 كۇن جاتتىق. ءتۇرلى كەزدەسۋلەر ءوتتى. سارسەنبايەۆ ۇسىنىستارىن ايتتى: "ەگەر كەلىسپەسەڭىزدەر، مەن حالىق الدىنا شىعىپ، مالىمدەمە جاسايمىن" دەدى. سول كەزدە مەن بارلىق تەلەارناعا بارىپ، ونىڭ ايتقان ءماتىنىن ءوز قولىممەن بەردىم. ديكتورلار 4 مينۋت بويى ءماتىندى ەش كارتيناسىز وقىدى. سول ارقىلى التەكەڭ ءوز تالابىن جەتكىزدى: "مەن وسىنداي ماقساتپەن ورالدىم. ەگەر ورىندالماسا، كەتەمىن" دەدى”، — دەپ ەسكە الدى ايدوس سارىم.
ونىڭ ايتۋىنشا، سارسەنبايەۆتىڭ سول مالىمدەمەسى سايلاۋعا بەلگىلى ءبىر وزگەرىس اكەلگەن.
“سول كەزدە ءبىر ساتتە 50-60 شاقتى گازەتتى تىركەپ الدىق. بۇل ۇلكەن جەڭىس بولدى. ءبىراق سايلاۋ ادىلەتتى وتكەندە، بالكىم، قازاقستاننىڭ تاريحى باسقاشا جازىلار ما ەدى”، — دەدى ساياساتتانۋشى.
ءسوز سوڭىندا سارىم اشىق قارسىلاستىقتىڭ ارتى قايعىلى وقيعامەن جالعاسىن تاپقانىن جەتكىزدى.
"ات قۇيرىعىن كەسىسكەننەن كەيىن، اشىق تەكەتىرەس ولىمگە اكەلدى. مەنمەندىك ەشقاشان جاقسىلىققا اپارمايدى"، — دەپ تۇيىندەدى ول.
ەسكە سالايىق، بۇعان دەيىن ايدوس سارىم «Sadaq media» ارناسىنا بەرگەن سۇحباتىندا التىنبەك سارسەنبايەۆتىڭ ولىمىنە قاتىستى دەرەكتەر ايتقان ەدى.
ونىڭ ايتۋىنشا، التىنبەكتىڭ قازاسىن نۇرسۇلتان نازاربايەۆپەن بايلانىستىرۋدىڭ قاجەتى جوق.
"كەزىندە رىسبەك سارسەنبايەۆ اعامىز ەموسيامەن ءبىراز دۇنيەنى ايتىپ جىبەردى. ءالى دە ايتىپ ءجۇر. ءبىراق وعان دالەل جوق قوي. ول جەردە نازاربايەۆتىڭ قۇلاعى كورىنۋى مۇمكىن. ءبىراق ادىلەت دەگەن بولۋى ءتيىس قوي، جوبالاپ، ىمداپ بولسا دا دالەلدەي العان ادام جوق. مەن ءوز باسىم التىنبەكتىڭ ءولىمىن راحات الييەۆكە جاقىنداتام. التىنبەكپەن جىلداپ ارالاسقان، ءالى كۇنگە دەيىن سول ورتادا جۇرگەن ءبىراز ازاماتپەن ارالاسام. ءبىراق ولاردىڭ ەشقايسىسى دا تىكەلەي نازاربايەۆتان كورىپ جاتقان جوق.
بۇل رىسبەكتىڭ ءوزىنىڭ ۇستانىمى، ءوزىنىڭ جەكە پىكىرى. كەزىندە التىنبەكتىڭ جانىندا جۇرگەن، قاعازىن جازىپ بەرىپ جۇرگەن رىسبەك ەمەس، مەن بولاتىنمىن. مەن ونى جاقسى بىلەمىن"، دەيدى ايدوس سارىم.
سونداي-اق ول التىنبەك سارسەنباي ۇلىنىڭ كەزىندە وتە كەكشىل بولعانىن ايتادى. ءبىراق ۋاقىت وتە كەلە وزگەرگەن.
«التىنبەك وتە كەكشىل ادام بولدى. كوپ ادامدى جەك كوردى. سولاردىڭ ءبىرى – سەرىك ءابدراحمانوۆ ەدى. ەكىنشى ءبىر ادام بولدى. ول - بالتاش تۇرسىنبايەۆ بولاتىن. ءبىراق ۋاقىت وتە كەلە وزگەردى، سانالى عۇمىرىندا ءوزىنىڭ جەك كورەتىن ادامدارمەن تاتۋلاسىپ، سولاردىڭ دەڭگەيىنە ءتۇسىپ، سويلەسكەنىن كوردىم»، - دەيدى دەپۋتات.
