Otan qorǵaýshylar kúnine orai Jarkent qalasynyń ortalyq alańynda ótken merekelik sharada erekshe oqiǵa boldy. 18 jastaǵy Rahat Qabyljan kútpegen syilyqqa ie bolyp, merzimdi áskeri qyzmetke joldama utyp aldy, dep habarlaidy dalanews.kz.
Uiymdastyrýshylardyń aitýynsha, mundai bastama jastardyń áskerge degen qyzyǵýshylyǵyn arttyryp, áskeri qyzmettiń mańyzyn nasihattaý maqsatynda qolǵa alynǵan.
Jas jigittiń ózi bul jańalyqty úlken qýanyshpen qabyldaǵanyn aitady. Onyń sózinshe, áskerge barý – bala kúnnen bergi armany.
"Shekaraǵa jaqyn aýdanda óstim. Áskeri formadaǵy adamdardy kórip óstik. Áskerde júrgen aǵalarymyz ben tanystarymyzǵa qyzyǵyp qaraitynmyn. Sondyqtan bul men úshin erekshe múmkindik boldy", – dedi Rahat Qabyljan.
Al aýdandyq qorǵanys isteri bóliminiń basshysy Serik Asanov jeńimpazǵa ózi tańdaǵan áskeri bólimde qyzmet etýge múmkindik beriletinin jetkizdi.
Aita keteiik, sońǵy jyldary elimizde jastardyń áskeri qyzmetke qyzyǵýshylyǵyn arttyrý baǵytynda túrli patriottyq jobalar men aktsiialar uiymdastyrylyp keledi.
