9 mamyr kúni Astanadaǵy Qalalyq alańda Uly Otan soǵysyndaǵy Jeńistiń 81 jyldyǵyna arnalǵan «Jeńis 9/45» atty merekelik kontsert ótti. Mýzykalyq jobany «Eýraziialyq monitoring» ortalyǵy uiymdastyrdy, dep habarlaidy dalanews.kz.
Kontsertke jinalǵan qala turǵyndary men qonaqtary soǵys jyldaryndaǵy ánderdi, patriottyq shyǵarmalardy tyńdap, tarihi estelikterge kýá boldy. Baǵdarlamada E. Rahmadiev atyndaǵy memlekettik akademiialyq filarmoniianyń úrmeli aspaptar orkestri óner kórsetti. Tikelei oryndalǵan mýzykalyq kompozitsiialar merekelik keshtiń áserin kúsheite tústi.
Kesh barysynda qazaqtyń dańqty batyrlary – Talǵat Bigeldinov, Mánshúk Mámetova, Áliia Moldaǵulova, Nurken Ábdirov jáne Baýyrjan Momyshuly týraly estelikter aityldy.
Jobanyń uiymdastyrýshysy Álibek Tájibaev kontserttiń basty maqsaty – Uly Jeńis týraly tarihi jadyny saqtaý jáne ony jas urpaqqa jetkizý ekenin atap ótti.
– «Jeńis 9/45» – jai ǵana mádeni shara emes. Bul – maidanda shaiqasqan, tylda eńbek etken býynǵa degen qurmet. Mýzyka arqyly biz beibit ómir syilaǵan erlerdiń erligin eske alamyz. Ótkenge taǵzym – bolashaqtyń kepili, – dedi ol.
Kontsert barysynda vokalister men bi ujymdary óner kórsetti. Sonymen qatar sahnaǵa shyqqan Mádi Qadyrov pen Argonya kórermenniń ystyq yqylasyna bólendi.
Kesh sońynda ónerpazdar men orkestr Jeńis ánderin qala turǵyndarymen birge oryndap, merekelik kontsert erekshe atmosferada qorytyndylandy.
