9 mamyr – Jeńis kúnine orai Aqtóbede Uly Otan soǵysynda qaza tapqan batyrlardy eske alý sharalary uiymdastyryldy. Saltanatty is-sharalarǵa 15 myńǵa jýyq adam qatysty, dep habarlaidy dalanews.kz.
Qala turǵyndary Dańq obeliskisine, «Zeńbirek» eskertkish-obeliskisine, Baýyrlastar ziratyna, sondai-aq Áliia Moldaǵulova men Mánshúk Mámetova eskertkishterine gúl shoqtaryn qoidy.
Eske alý rásimderine Aqtóbe oblysynyń ákimi Ashat Shaharov, memlekettik organdar men kúshtik qurylym ókilderi, depýtattar, ardagerler jáne qoǵamdyq uiym músheleri qatysty.
Jinalǵandar maidanda qaza tapqan jaýyngerlerdi bir minýt únsizdikpen eske alyp, eldiń azattyǵy men beibit bolashaǵy úshin janyn qiǵan erlerge taǵzym etti.
Sondai-aq Jeńis kúni oblys ákimi óńirdegi jalǵyz Uly Otan soǵysynyń ardageri, 102 jastaǵy Vasilii Gretskiimen kezdesip, oǵan Qasym-Jomart Toqaevtiń quttyqtaý hatyn tabystady.
Prezident quttyqtaýynda Jeńis merekesiniń jeńimpaz urpaqtyń qaisar rýhy men erliginiń simvoly ekeni atap ótilgen.
Óńir basshysy soǵys jyldary Aqtóbe oblysynan 122 myń adam maidanǵa attanyp, olardyń 36 myńy elge oralmaǵanyn aitty. Sonymen qatar aqtóbelik 35 azamat Keńes Odaǵynyń Batyry atanyp, 9 jaýynger Dańq ordeniniń tolyq iegeri bolǵan.
– Vasilii Ivanovich Uly Otan soǵysy maidandarynda shaiqasyp, Jeńisti Berlin túbinde qarsy alǵan. Onyń ómir joly – erlik pen Otanǵa adal qyzmet etýdiń aiqyn úlgisi, – dedi Ashat Shaharov.
Ardagerdiń qurmetine Hromtaý qalasyndaǵy úiiniń aýlasynda merekelik kontsert uiymdastyrylyp, patriottyq ánder shyrqaldy.
Jeńis kúnine arnalǵan sharalar ótkenge taǵzym men urpaqtar sabaqtastyǵynyń mańyzdy belgisine ainaldy.
