29 sáýir kúni saǵat 15:00-de Almatydaǵy Ulttyq kitaphanada jazýshy, "Alash" halyqaralyq ádebi syilyǵynyń iegeri Jalǵasqali Dútmaǵanbetovtyń "1812 jyl: Soǵys jáne Beibitshilik (Qazaqy nusqa)" atty tarihi trilogiiasynyń tusaýkeser rásimi ótedi,– dep habarlaidy Dalanews.kz
Qazaq tarihynda ashyq aitylmai kele jatqan aqtańdaqtar az emes. Osylai ekenin atyraýlyq jazýshy, «Alash» halyqaralyq ádebi syilyǵynyń iegeri Jalǵasqali Dútmaǵanbetovtyń «1812 jyl: Soǵys jáne Beibitshilik (Qazaqy nusqa)» deitin trilogiiasynan da anyq bilýge bolady.
Biz Napoleonnyń áskerin ókshelep qýyp, Parijge deiin barǵan orys áskeriniń quramynda shaiqasqan qazaqtar erekshe erlik jasaǵanyn frantsýz tarihshylarynyń aitýy boiynsha bildik. Kitaptarda eki júz jyldyq taǵdyrymyz naqty derek kózderine súiene otyryp baiandalady. Arhivtik materialdar paidalanylady. Eń ǵajaby, bul soǵysqa avtordyń babalary qatysqan. Bir babasy Frantsiiadan jalǵyz qaitpai, Mishel degen sulýdy ala qaitady. Ókinishtisi, ol bala ústinde kóz jumady. Ómirge ul keledi, ol ósedi, urpaq ulastyrady. Búginde frantsýzdyń jiensharlary birshama. Solardyń boiyndaǵy qan úzilmei, arada áldeneshe urpaq ótse de, betteri aq sary, kózderi kók bolyp keledi eken. Kitapta fotosýretter de berilgen. Sonyń biri Qulsarydaǵy Misheldiń beiitiniń sýreti. Bir áýlettiń burynǵysy men búgingisi úzilmei, jatyq tilmen astasa jalǵasyp jetkiziledi.
Ásire boiaýdan aýlaq úsh tom avtordyń óz qarjylandyrýy boiynsha az taralymmen ǵana «Toǵanai T» baspasynan jaryq kórdi. Taǵy bir ereksheligi, qazaqsha nusqasy tanymal kásibi aýdarmashylardyń arqasynda orys, aǵylshyn jáne frantsýz tilderinde de basylyp shyqty. Aýdarma sapasyna erekshe mán bergen avtor Abylaihan atyndaǵy Álem tilderi ýniversitetiniń ustazdar ujymymen berik bailanysta bolyp, aýdamashylarmen de shyǵarmashylyq turǵyda jumys istedi.
Barsha kitapsúier qaýymdy tarihi oqiǵaǵa kýá bolýǵa shaqyramyz!
