AQSh-tyń The New York Times basylymy Donald Tramp ákimshiliginiń Qazaqstandaǵy volfram ken oryndaryn igerý týraly kelisimi prezidenttiń uldaryna qarjylyq paida ákelýi múmkin degen zertteý jariialady, dep habarlaidy dalanews.kz.
Basylymnyń málimetinshe, AQSh pen Qazaqstan arasyndaǵy kelisim amerikalyq Kaz Resources kompaniiasyna álemdegi eń iri igerilmegen volfram qorlarynyń birine qol jetkizýge múmkindik bergen. Bul joba AQSh úshin strategiialyq mańyzy bar, óitkeni volfram qorǵanys ónerkásibinde, áskeri tehnikada, jartylai ótkizgishter óndirisinde jáne joǵary tehnologiialyq ónimderde keńinen qoldanylady.
NYT deregine sáikes, kelisim jasalǵannan keiin kóp uzamai Donald Tramptyń uldary – Donald Tramp kishi men Erik Tramppen bailanysty Dominari Securities kompaniiasy jobaǵa qatysatyn qurylymnyń shamamen 20 paiyz úlesin ielengen. Sonymen qatar AQSh Saýda ministri Hovard Latniktiń uldary basqaratyn Cantor Fitzgerald kompaniiasy da jobaǵa investitsiia tartýǵa qatysqan. Bul jaǵdai AQSh-ta yqtimal múddeler qaqtyǵysy týraly pikirtalas týǵyzdy.
Buǵan deiin Financial Times te Tramptyń uldary Qazaqstandaǵy volfram jobasyn júzege asyratyn kompaniianyń úlesin alǵanyn habarlaǵan bolatyn. Basylym málimetinshe, AQSh memlekettik institýttary jobaǵa 1,6 mlrd dollarǵa deiin qarjylyq qoldaý kórsetýge daiyn ekenin málimdegen.
AQSh ákimshiligi bul kelisimniń negizgi maqsaty Qytaiǵa táýeldilikti azaityp, AQSh-tyń strategiialyq mańyzdy mineraldarǵa qoljetimdiligin qamtamasyz etý ekenin aitady. Al synshylar memlekettik qoldaý kórsetilgen jobaǵa prezident otbasynyń qatysýy etikalyq suraqtar týyndatatynyn alǵa tartyp otyr.
