Almaty oblysynda halyqtyń ulttyq rýhyn oiatyp, darhan dalany dýmanǵa bólegen «Qymyzmuryndyq – 2026» festivali óz máresine jetti. Biyl bul merekege elimizdiń túkpir-túkpiri men alys-jaqyn shet elderden 35 myńǵa jýyq qonaq keldi. Festivalde ulttyq sport túrlerinen túrli saiystar ótip, mereke qorytyndysynda júzden júirik, myńnan tulpar shyqqandar marapattaldy, dep habarlaidy dalanews.kz.
Mereke barysynda Myńjylqynyń tósin dúbirletken myń jylqynyń kórinisi jinalǵan kópshiliktiń nazaryn ózine erekshe aýdardy. Jer tarpyǵan jylqylar dúbirin estigende, eleń etpegen el qalmady.
Dúiim jurttyń jiger, namysyn janyp ótken báigeniń de orny erekshe boldy. Biyl bul jarysta eki júzge jýyq tańdaýly shabandoz baq synady.
Júlde qory da qomaqty boldy. Alaman báigeniń jeńimpazy Jetour X70 FL Prestige avtokóliginiń iegeri atandy. Ekinshi orynǵa – 2,5 million teńge, úshinshi orynǵa 1 million teńge berildi.
«Túie palýan» jarysy da jankúierler nazaryndaǵy basty básekelerdiń birine ainaldy. Bilekti balýandar kúsh synasatyn saiystyń jeńimpazdary da júldeli syilyqtardan qalys qalǵan joq.
«Qoshqar kóterý» jarysyn da kópshilik qyzyǵa tamashalady. Syrttai qaraǵanda qarapaiym kóringenimen, bul saiys zor kúsh-qýatty, tózimdilikti, qoldyń qarymyn jáne durys ádis-tásildi talap etedi. Dástúr boiynsha qoshqardy eń kóp kótergen sportshy ony óz júldesi retinde aldy.
«Alyptar saiysynda» qatysýshylar naiza laqtyrý, temir shybyq iiý, aýyr tasty kóterip júrý, 100 kelilik bórenemen jattyǵý jáne 500 kelilik arbany súireý sekildi qiyn akrobatikalyq tásilderdi kórsetti. Saiys jeńimpazy 1,5 million teńge kólemindegi bas júldeni ielense, ózge júldegerlerge de qomaqty aqshalai syiaqylar tabystaldy.
Negizgi jarystardan bólek festivalde qol kúresi, arqan tartý, toǵyzqumalaq, shahmat, qoi qyrqý jáne kóshpeli ómirdiń ajyramas bóligine ainalǵan ózge de ulttyq saiystar ótkizildi.
Qarqara jailaýynda uiymdastyrylǵan bul mereke ulttyq sporttyń mereiin ústem etip, qazaq halqynyń rýhani qundylyqtaryn dáriptegen mańyzdy mádeni shara retinde este qaldy.
