Qytai Halyq Respýblikasynyń Beijiń qalasynda Abai oblysynyń ákimi Berik Ýáli birqatar iri qytailyq investorlarmen kezdesip, jalpy quny 2,5 milliard AQSh dollaryn quraityn yntymaqtastyq týraly memorandýmdarǵa qol qoidy. Kelisimder óńirdiń ónerkásiptik jáne infraqurylymdyq áleýetin arttyrýǵa baǵyttalǵan, dep habarlaidy dalanews.kz.
Aimaq basshysy aldymen halyqaralyq injenerlik jáne investitsiialyq «DDS Group» kompaniiasynyń ókilderimen kezdesti. Kezdesý qorytyndysynda taraptar ózara túsinistik jáne yntymaqtastyq týraly memorandýmǵa qol qoidy. Qujatqa sáikes, kompaniia Maqanshy aýdanynyń Baqty aýylynda jalpy aýmaǵy 3 myń gektardy quraityn indýstriialyq park salýdy josparlap otyr. Jobanyń investitsiialyq quny – 1,5 milliard AQSh dollary.
Sonymen qatar Berik Ýáli Qytaidyń jetekshi ónerkásiptik holdingteriniń biri sanalatyn Jiachen Group basshylyǵymen kelissóz júrgizdi. Kezdesý nátijesinde Abai oblysynyń ákimdigi, Liaoning Jiachen Holding Group jáne Xinjiang Sanbao Industrial Group arasynda Maqanshy aýdanynda aliýminii zaýytyn salý jónindegi memorandýmǵa qol qoiyldy. Jobanyń quny 1 milliard AQSh dollaryn quraidy.
Jańa óndiris orny iske qosylǵannan keiin óńirde myńdaǵan jańa jumys orny ashylady dep kútilýde. Investorlar jobalardy júzege asyrý jumystaryn jaqyn arada bastaýǵa daiyn ekenderin málimdedi.
Sapar barysynda oblys ákimi sondai-aq China Railway Construction Engineering Group (CRCEG) kompaniiasynyń ókilderimen kezdesip, Abai oblysyndaǵy kólik-logistikalyq jáne infraqurylymdyq jobalardy birlesip iske asyrý múmkindikterin talqylady. Taraptar qurylys salasyndaǵy yntymaqtastyqty keńeitý jáne óńirdiń tranzittik áleýetin arttyrý máselelerine nazar aýdardy.
Atalǵan kelisimder Abai oblysyna sheteldik investitsiia tartý, jańa óndirister ashý, jumys oryndaryn qurý jáne óńir ekonomikasyn ártaraptandyrý baǵytyndaǵy mańyzdy qadamdardyń biri sanalady.
