Túrkistan oblysynda adam shoshyrlyq jol-kólik oqiǵasy boldy. Túlkibas aýdany Eńbekshi aýyly mańynda bolǵan apat saldarynan bir otbasynyń bes balasy kóz jumdy. Taǵy bir bala aýyr jaraqat alyp, aýrýhanaǵa jetkizildi, dep habarlaidy dalanews.kz.
OTYRAR málimetinshe, Volkswagen Polo avtokóligi joldan shyǵyp ketip, aǵashqa soǵylǵan. Soqqynyń qatty bolǵany sonsha, kólik ekige bólinip ketken.
Apattan aman qalǵan balanyń ómirin dárigerler saqtap qaldy. Degenmen onyń jaǵdaiy áli de aýyr dep baǵalanyp otyr. Ata-anasynyń ótinishine bailanysty balanyń densaýlyǵyna qatysty tolyq málimet jariialanbaidy.
Politsiianyń aldyn ala málimeti boiynsha, júrgizýshi kólik tizginine ie bola almai qalǵan bolýy múmkin. Qaiǵyly oqiǵaǵa bailanysty qylmystyq is qozǵaldy. Qazir tergeýshiler apattyń naqty sebebi men barlyq mán-jaiyn anyqtap jatyr.
Bas prokýratýra dereginshe, 2026 jyldyń alǵashqy bes aiynda Túrkistan oblysynda 461 jol-kólik oqiǵasy tirkelgen. Osy apattardan 100 adam qaza taýyp, taǵy 573 adam túrli deńgeide jaraqat alǵan.
