29 ءساۋىر كۇنى ساعات 15:00-دە الماتىداعى ۇلتتىق كىتاپحانادا جازۋشى، "الاش" حالىقارالىق ادەبي سىيلىعىنىڭ يەگەرى جالعاسقالي دۇتماعانبەتوۆتىڭ "1812 جىل: سوعىس جانە بەيبىتشىلىك (قازاقى نۇسقا)" اتتى تاريحي تريلوگياسىنىڭ تۇساۋكەسەر ءراسىمى وتەدى،– دەپ حابارلايدى Dalanews.kz
قازاق تاريحىندا اشىق ايتىلماي كەلە جاتقان اقتاڭداقتار از ەمەس. وسىلاي ەكەنىن اتىراۋلىق جازۋشى، «الاش» حالىقارالىق ادەبي سىيلىعىنىڭ يەگەرى جالعاسقالي دۇتماعانبەتوۆتىڭ «1812 جىل: سوعىس جانە بەيبىتشىلىك (قازاقى نۇسقا)» دەيتىن تريلوگياسىنان دا انىق بىلۋگە بولادى.
ءبىز ناپولەوننىڭ اسكەرىن وكشەلەپ قۋىپ، پاريجگە دەيىن بارعان ورىس اسكەرىنىڭ قۇرامىندا شايقاسقان قازاقتار ەرەكشە ەرلىك جاساعانىن فرانسۋز تاريحشىلارىنىڭ ايتۋى بويىنشا بىلدىك. كىتاپتاردا ەكى ءجۇز جىلدىق تاعدىرىمىز ناقتى دەرەك كوزدەرىنە سۇيەنە وتىرىپ باياندالادى. ارحيۆتىك ماتەريالدار پايدالانىلادى. ەڭ عاجابى، بۇل سوعىسقا اۆتوردىڭ بابالارى قاتىسقان. ءبىر باباسى فرانسيادان جالعىز قايتپاي، ميشەل دەگەن سۇلۋدى الا قايتادى. وكىنىشتىسى، ول بالا ۇستىندە كوز جۇمادى. ومىرگە ۇل كەلەدى، ول وسەدى، ۇرپاق ۇلاستىرادى. بۇگىندە فرانسۋزدىڭ جيەنشارلارى ءبىرشاما. سولاردىڭ بويىنداعى قان ۇزىلمەي، ارادا الدەنەشە ۇرپاق وتسە دە، بەتتەرى اق سارى، كوزدەرى كوك بولىپ كەلەدى ەكەن. كىتاپتا فوتوسۋرەتتەر دە بەرىلگەن. سونىڭ ءبىرى قۇلسارىداعى ميشەلدىڭ بەيىتىنىڭ سۋرەتى. ءبىر اۋلەتتىڭ بۇرىنعىسى مەن بۇگىنگىسى ۇزىلمەي، جاتىق تىلمەن استاسا جالعاسىپ جەتكىزىلەدى.
اسىرە بوياۋدان اۋلاق ءۇش توم اۆتوردىڭ ءوز قارجىلاندىرۋى بويىنشا از تارالىممەن عانا «توعاناي ت» باسپاسىنان جارىق كوردى. تاعى ءبىر ەرەكشەلىگى، قازاقشا نۇسقاسى تانىمال كاسىبي اۋدارماشىلاردىڭ ارقاسىندا ورىس، اعىلشىن جانە فرانسۋز تىلدەرىندە دە باسىلىپ شىقتى. اۋدارما ساپاسىنا ەرەكشە ءمان بەرگەن اۆتور ابىلايحان اتىنداعى الەم تىلدەرى ۋنيۆەرسيتەتىنىڭ ۇستازدار ۇجىمىمەن بەرىك بايلانىستا بولىپ، اۋداماشىلارمەن دە شىعارماشىلىق تۇرعىدا جۇمىس ىستەدى.
بارشا كىتاپسۇيەر قاۋىمدى تاريحي وقيعاعا كۋا بولۋعا شاقىرامىز!
