Qyrkúıek aıynda OPEK+ aıasyndaǵy segiz memleket munaı óndirý kólemine qatysty erikti shekteýlerdi táýligine 547 myń barelge qysqartady. Bul Qazaqstannyń qyrkúıek aıynda munaı óndirisin táýligine 1,5 mln barelge deıin ulǵaıtýǵa múmkindik beredi, dep habarlaıdy Dalanews.kz.
Bul týraly uıymnyń resmı baspasóz habarlamasynda aıtylǵan.
"Qazaqstan, Reseı, Saýd Arabıasy, BAÁ, Irak, Kýveıt, Aljır jáne Oman ǵalamdyq munaı naryǵyndaǵy turaqtylyqty qoldaýǵa daıyn ekendikterin rastady. Olar naryqtaǵy turaqty suranysty, qorlardyń tómen deńgeıin jáne qolaıly irgeli kórsetkishterdi ataı kele, bul ózderiniń aldynda engizilgen erikti shekteýlerdi joıýdyń kezekti kezeńine ótýge múmkindik bergenin naqtylaıdy. Atalǵan sheshimge sáıkes, qyrkúıek aıynda segiz el tamyz aıymen salystyrǵanda táýligine qoıylǵan erikti shekteýlerdi 547 myń barelge qysqartady", delingen resmı habarlamada.
Bul - sáýir aıynda qolǵa alynǵan naryqtyń táýligine 2,2 mıllıon barel munaı óndirisine birtindep oralý jónindegi keń aýqymdy jospardyń bir bóligi. Bul sheshim turaqty ekonomıkalyq boljamdar men naryqtaǵy qolaıly jaǵdaı, atap aıtqanda, álemdik munaı qorlarynyń tómen deńgeıi aıasynda qabyldandy. Osylaısha, qatysýshy elder ózara kelisilgen erikti shekteýler rejıminen josparlanǵan merzimnen bir jyl buryn — 2025 jyldyń qyrkúıeginiń sońynda, ıaǵnı 2026 jylǵa deıin kútpeı-aq shyǵa alady. Alaıda, naryqtaǵy jaǵdaı kúrt nasharlasa, bul proses toqtatylýy nemese múlde joıylýy múmkin.
Naryqqa qatysýshylar ıkemdilikti saqtaý olarǵa naryqtyń aýytqýlaryna tezirek beıimdelýge jáne 2024 jyldyń qańtarynan bastap jınaqtalǵan artyq óndiris kólemin óteý boıynsha mindettemelerdi oryndaýǵa múmkindik beretinin atap ótti. Monıtorıń JMMC ýaǵdalastyqtarynyń oryndalýyn baqylaýdy qosa alǵanda, buryn kelisilgen OPEK+ tetikteri sheńberinde júrgiziletin bolady.
Segiz eldiń kelesi kezdesýi 2025 jyldyń 7 qyrkúıeginde ótedi. Onyń qorytyndysy boıynsha OPEK+ elderi naryqtyń jaı-kúıin jáne aǵymdaǵy sharalardyń tıimdiligin baǵamdaıdy.
OPEK+ málimetinshe, qyrkúıek aıynda eń joǵary kvotalar kelesi elderge bólinbek:
- Saýd Arabıasy – 9,978 mln barr./táýlik,
- Reseı – 9,449 mln,
- Irak – 4,220 mln,
- BAÁ – 3,375 mln,
- Kýveıt – 2,548 mln,
- Aljır – 959 myń,
- Oman – 801 myń.
