Almaty qalasynyń Qoǵamdyq keńistikterdi damytý basqarmasy qalada jaily qalalyq orta qurýǵa baǵyttalǵan jańa jobanyń bastalǵany týraly málimdedi. Ál-Farabi dańǵyly jáne Dýlati kósheleriniń qiylysynda zamanaýi FLOW Park sport saiabaǵynyń qurylysy iske asyrylmaq,- dep habarlaidy Dalanews.kz
Joba jeke investorlar «Kusto Home» JShS jáne «Time Group Construction» JShS-niń qoldaýymen júzege asyrylady. Qurylysqa 3 mlrd teńge qarjy quiylǵan. Saiabaq qurylysy tek demeýshilik qarajat esebinen júrgiziledi, buǵan memlekettik biýdjetten qarjy bólinbeidi.
FLOW saiabaǵy qala turǵyndary men qonaqtary úshin salaýatty ómir saltyn ustanyp, sportpen ainalysýǵa jáne belsendi demalysqa arnalǵan jańa demalys orynǵa ainalmaq. Bolashaq saiabaq aýmaǵynda velosiped jáne jaiaý júgirý jolaqtary, ashyq aspan astyndaǵy jattyǵý qurylǵylary, oiyn jáne sport alańdary, sondai-aq, tynyǵýǵa jáne sergitýge arnalǵan aimaqtar ornalastyrylady.
Saiabaq burynnan bar landshaftpen tolyq úilesim tabady.
FLOW saiabaǵyn salý — megapolistegi árbir turǵyn men qonaqqa belsendi ári sapaly demalysqa arnalǵan qoljetimdi, qaýipsiz jáne inkliýzivti qalalyq orta qalyptastyrý jolyndaǵy kezekti mańyzdy qadam.
