Atyraýda tórt adamnyń ólimine qatysty aiyp taǵylǵan Sultan Sársemálievtiń soty jalǵasyp jatyr, dep dalanews.kz tilshisi kznews.kz saityna silteme jasap habarlaidy.
Sársemálievtiń aitýynsha, balalaryna onyń anasy qaraǵan. Al 2025 jyldyń qyrkúieginde jubaiy Aqbaian Muqanǵalievaǵa birinshi top múgedektigi bar degen anyqtama berilgen. Keiin ony áreketke qabiletsiz dep taný týraly sheshimdi kútý kerek bolǵan.
Aiyptalýshy osy aralyqta úsh jasar qyzy men áielin ertip, qaiyn jurty turatyn Jangeldin aýylyna barmaq bolǵanyn aitty. Onyń sózinshe, ol Aqbaiannyń týystarymen sóilesip, jaǵdaidy túsindirgisi kelgen.
"Kózqarastary ózgergen shyǵar dep oiladym. Barǵan soń sóilesemin dedim. Eger bári jaqsy bolsa, Aqbaianǵa qamqorshy retinde sol kisilerdi taǵaiyndaýǵa bolady dep oiladym. Eshteńe josparlap barǵan joqpyn. Janymda úsh jasar qyzym boldy. Tek olardyń oiyn bilgim keldi", – dedi Sársemáliev sotta.
Onyń aitýynsha, bul jaǵdai 3 qarasha kúni bolǵan. Aiyptalýshy úige kirgen sátte qaiyn jurty ony jaqtyrmai qarsy alǵanyn jetkizdi.
"Úidegiler nege kelgenimdi surady. Esikten kirgen boida aýyr sózder aitty. Aqbaian demalsyn, erteń sóileseiik dedim de, uiyqtap qaldym", – dedi ol.
Sársemálievtiń sózinshe, kelesi kúni tańerteń ony áieliniń ákesi oiatyp, qalǵan balalardy da alyp kelýdi talap etken.
"Tańerteń aiaǵymnan teýip oiatty. Qalǵan balalar qaida, olardy alyp kel dedi. Aqbaian osy úide qalady dedi. Sol kezde beker kelgenimdi túsingendei boldym", – dedi aiyptalýshy.
Ol qamqorshylyq pen múgedektikke qatysty máseleni túsindirip úlgermegenin aitty. Aiyptalýshynyń sózinshe, qaiyn jurty basqa balalardy da ákelýdi talap etip, eger bul talap oryndalmasa, onyń úiine baryp janjal shyǵaratynyn aitqan.
Sársemáliev sotta sol jaǵdai ózine psihologiialyq turǵydan aýyr tigenin jetkizdi. Sonymen qatar ol elge jetkizilgen soń qylmysyn moiyndaǵanyn aitty.
"Tergeýshige jetpei-aq, áýejaida qarsy alǵan adamdarǵa bárin moiyndadym. Aqtalýǵa nemese qylmystan jaltarýǵa tyrysqan joqpyn", – dedi ol.
Sot otyrysynda aiyptalýshy kózine jas alyp, bolǵan jaǵdaiǵa ókinetinin de jetkizdi.
