2026 jylǵy 21 qarashada Qazaqstan Respýblikasynyń Memlekettik kúzet qyzmeti Airyqsha maqsattaǵy kúshteriniń áskeri bólimderinde 2026 jylǵy kúzgi shaqyrylym boiynsha merzimdi áskeri qyzmet sarbazdarynyń Áskeri ant qabyldaý rásimi boldy, dep habarlaidy dalanews.kz.
«Aibyn» prezidenttik polki» áskeri qyzmetshileriniń Áskeri ant qabyldaý rásimi Astana qalasyndaǵy «Qazaq eli» alańynda (Táýelsizdik saraiynyń aldynda), al «Batyr» prezidenttik polki sarbazdarynyń osyndai saltanaty Almaty qalasyndaǵy 28 gvardiiashy-panfilovshylar saiabaǵynda óttti. Áskeri ant qabyldaý saltanatyna jas sarbazdardyń ata-analary men jaqyndary qatysty.
QR MKQ qataryndaǵy 2026 jylǵy kúzgi shaqyrylym boiynsha merzimdi áskeri qyzmet sarbazdary elimizdiń barlyq aimaqtary men respýblikalyq mańyzy bar qalalarynan iriktelip alynǵan. Olar áskeri bólimderdiń dalalyq oqý ortalyqtarynda jańa shaqyrylym sarbazdaryn daiyndaý kýrsynan ótti.
Áskeri ant qabyldaý saltanaty – erekshe jaýyngerlik rásimderdiń biri. Ant qabyldaý arqyly sarbazdar ózderine Otandy qorǵaýǵa ázir bolýǵa, áskeri qyzmet mindetterin adal atqarýǵa jaýapkershilik alady.
QR MKQ áskeri bólimderinde merzimdi qyzmet atqarý barysynda jas sarbazdar tájiribeli nusqaýshylyq quramnyń jetekshiligimen áskeri iske úirenedi, jaýyngerlik jáne arnaiy daiarlyq sabaqtarynda áskeri mamandyqtardy meńgeredi.
Áskeri ant qabyldaǵan soń merzimdi qyzmet sarbazdary QR MKQ atqaratyn: Qazaqstan Respýblikasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarýǵa kirisedi.
QR Memlekettik kúzet qyzmeti merzimdi áskeri qyzmet sarbazdary qataryna elimizdiń 18 ben 27 jas aralyǵyndaǵy, boiy 180 sm-den joǵary jáne 195 sm-den aspaityn, bilimi orta jáne odan joǵary, densaýlyǵy jaqsy kez kelgen azamaty qabyldana alady. Joǵary bilimdi, sporttyq jetistikteri men razriadtary bar úmitkerlerge basymdyq beriledi.
Merzimdi áskeri qyzmetti QR Memlekettik kúzet qyzmeti qatarynda atqarý jas azamattar úshin myqty erlik mektebi bolady, olar munda óziniń ómirlik jolyna qajetti mańyzdy daǵdylarǵa úirenedi. Jastar úshin bul kezeń ary qaraiǵy mansap jolyn jalǵastyrýǵa qajetti áleýmettik lift bolýy múmkin. Merzimdi áskeri qyzmetti aiaqtaǵandar qalaýy boiynsha qyzmetti kelisimshart negizinde jalǵastyra alady, odan ári olardyń arnaýly memlekettik organnyń qyzmetkeri jáne ofitseri bolyp, kúzetiletin tulǵalar men obektilerdiń qaýipsizdigin qamtamasyz etý boiynsha mindetterdi atqarý múmkindigi bar.
Sonymen qatar QR MKQ merzimdi qyzmet sarbazdaryna merzimdi áskeri qyzmet atqarǵan azamattardy áleýmettik qoldaý boiynsha Qazaqstan Respýblikasynda belgilengen barlyq jeńildikter (mysaly, “Srochniki 2.0” baǵdarlamasyna qatysý) jasalady.