Mońǵoliia prezidenti Ýhnaagiin Húrelsúh merziminen buryn qyzmetinen ketti. El parlamenti memleket basshysynyń otstavkaǵa ketý týraly ótinishin maquldady. Bul sheshim onyń atyna qatysty jemqorlyq aiyptaýlary aitylǵan tusta qabyldandy, dep habarlaidy dalanews.kz.
19 qarashada Mońǵoliianyń Uly memlekettik hýraly prezidenttiń ókilettigin merziminen buryn toqtatý máselesin qarady.
Parlamenttiń resmi málimetinshe, otyrysqa qatysqan 104 depýtattyń 96-sy Húrelsúhtiń otstavkasyn qoldaǵan. Bul – daýys berýge qatysqandardyń 92,3 paiyzy.
Ýhnaagiin Húrelsúh prezidenttik qyzmetin óz erkimen merziminen buryn toqtatqan Mońǵoliia tarihyndaǵy alǵashqy memleket basshysy atandy.
Prezident ne sebepti qyzmetinen ketti?
Buǵan deiin Mońǵoliiada prezidentke qatysty jemqorlyq aiyptaýlary aitylǵan bolatyn.
Saiasi qarsylastary Húrelsúhtiń premer-ministr qyzmetin atqarǵan kezeńindegi temirjol qurylysyna bailanysty qarjylyq zańbuzýshylyqtarǵa qatysy bolýy múmkin ekenin málimdegen. Atap aitqanda, másele Tavan-Tolgoi kómir ken ornymen bailanysty temirjol jobasyna qatysty kóterilgen. Alaida Húrelsúh ózine taǵylǵan aiyptardy joqqa shyǵaryp, olardy bedeline nuqsan keltirý áreketi dep baǵalady.
Sondai-aq ol tiisti tergeý júrgizilýine daiyn ekenin jetkizdi. Jemqorlyqqa qarsy organdar prezidenttiń zańsyz tólem alǵanyn rastaityn dálelder anyqtalmaǵanyn habarlaǵan.
17 qarashada memleket basshysy qyzmetinen ketýge daiyn ekenin málimdegen edi. Eki kúnnen keiin parlament onyń ótinishin resmi túrde maquldady.
Mońǵoliiany endi kim basqarady?
El Konstitýtsiiasyna sáikes, jańa prezident sailanǵanǵa deiin memleket basshysynyń ókilettigi Uly memlekettik hýral tóraǵasy Sandagiin Biambatsogtqa berildi. Ol jańadan sailanǵan prezident ant qabyldaǵanǵa deiin el basshysynyń mindetin atqarady.
Parlament Mońǵoliiada merziminen buryn prezident sailaýyn uiymdastyrýy tiis.
Aita keteiik, Ýhnaagiin Húrelsúh 2021 jylǵy maýsymnan beri Mońǵoliia prezidenti qyzmetin atqaryp kelgen. Buǵan deiin ol eldiń premer-ministri bolǵan.