Almatydaǵy №2 mamandandyrylǵan balalar men jasóspirimder sport mektebiniń manejinde bolǵan órtke dánekerleý jumystary kezinde órt qaýipsizdigi talaptarynyń saqtalmaýy sebep bolǵan. Bul týraly jýrnalist Mihail Kozachkovtyń Telegram-arnasynda jazyldy, dep habarlaidy dalanews.kz.
Derekkózdiń málimetinshe, ǵimaratta jóndeý jumystary júrgizilip jatqan kezde dánekerleý barysynda ushqyn shashyrap, sonyń saldarynan órt shyqqan. Osy oqiǵaǵa bailanysty Almaty qalasynyń Tótenshe jaǵdailar departamenti qylmystyq isti tergep jatyr.
Eske salaiyq, órt 15 qarashada Almaly aýdanyndaǵy Brýsilovskii kóshesinde ornalasqan eki qabatty ǵimaratta bolǵan. Tótenshe jaǵdailar ministrliginiń málimetinshe, órt sóndirýshiler oqiǵa ornyna jetken kezde ǵimarat ashyq jalynǵa oranǵan. Órt kórshiles nysandarǵa taralý qaýpin týdyrǵan.
Qutqarýshylar órtti saǵat 10:25-te tolyq sóndirdi. Zardap shekkender bolǵan joq. Aldyn ala málimet boiynsha, jalyn shamamen 1,1 myń sharshy metr aýmaqty zaqymdaǵan.
Qalalyq sport basqarmasynyń habarlaýynsha, manej burynǵy ornynda qalpyna keltiriledi. Mamandar aldymen ǵimarattyń tehnikalyq jaǵdaiyn tekserip, sodan keiin jóndeý jumystarynyń kólemi men merzimin anyqtaidy.
Órt saldarynan jattyǵý ornysyz qalǵan 352 sportshynyń daiyndyǵy basqa sport nysandarynda jalǵasady. Olardy jattyǵý oryndaryna jetkizý úshin avtobýstar bólinedi.