Aqmola oblysynyń eki turǵyny Soltústik Qazaqstan oblysyndaǵy kólden 336,4 keli artemiia jumyrtqasyn zańsyz óndirgeni úshin bir jylǵa bas bostandyǵynan aiyryldy. Memleketke keltirilgen ekologiialyq shyǵyn 5,9 mln teńgege jýyq, dep habarlaidy dalanews.kz.
Soltústik Qazaqstan oblysy prokýratýrasynyń málimetinshe, oqiǵa 2025 jylǵy shildede Taiynsha aýdanyndaǵy kólderdiń birinde bolǵan. Eki er adam sý biologiialyq resýrstaryn zańsyz óndirý týraly aldyn ala kelisip, túngi ýaqytta kólge barǵan.
Olar 336,4 keli artemiia jumyrtqasyn zańsyz jinap, ony aqshalai syiaqyǵa satýdy josparlaǵan. Alaida oqiǵa ornynda politsiia qyzmetkerleri ustap, óndirilgen biologiialyq resýrstar men aýlaý quraldaryn tárkilegen.
Tergeý materialdary boiynsha, memleketke keltirilgen ekologiialyq zalal 5 952 104 teńgeni quraǵan.
Sot barysynda aiyptalýshylar kinálaryn moiyndap, jasaǵan áreketterine ókingen jáne keltirilgen shyǵyndy tolyq ótegen. Soǵan qaramastan, sot qylmystyń paidakúnemdik sipatyn, aldyn ala sóz bailasýdy jáne ekologiialyq zalaldyń kólemin eskerip, naqty bas bostandyǵynan aiyrý jazasyn taǵaiyndaǵan.
Soltústik Qazaqstan oblysynyń qylmystyq ister jónindegi mamandandyrylǵan aýdanaralyq sotynyń 2026 jylǵy 21 qyrkúiektegi úkimimen eki azamat Qylmystyq kodekstiń 335-baby 4-bóliginiń 1-tarmaǵy boiynsha kináli dep tanyldy. Raqymshylyq týraly zań eskerilip, árqaisysyna bir jyl bas bostandyǵynan aiyrý jazasy belgilendi.
Úkim zańdy kúshine endi.
Aita keteiik, artemiia salinanyń jumyrtqalary balyq ósirýde, farmatsevtika ónerkásibinde jáne basqa da salalarda qoldanylady. Ony baqylaýsyz óndirý sý ekojúiesine jáne tabiǵi tepe-teńdikke ziian keltirýi múmkin.