Tailandta joǵalyp ketkeni aitylǵan qazaqstandyq reper Darhan Jumabekke qatysty jańa aqparat shyqty. Kópshilikke Kislo-Sladkii laqap atymen tanymal ánshiniń tabylǵanyn Salaýat esimdi kásipker Instagram paraqshasynda jazdy, dep habarlaidy dalanews.kz.
Onyń aitýynsha, qazir Darhan aýrýhanada dárigerlerdiń baqylaýynda jatyr. Kásipker reperdiń taǵy bir táýlik em alyp, qalpyna kelgen soń ózi efirge shyǵyp, bolǵan jaǵdaidy túsindiredi degen úmitin jetkizdi.
"Izdegen, alańdaǵan, kómektesken ár adamǵa raqmet. Eń bastysy – adam tabyldy jáne qaýipsiz jerde. Adam bolǵan soń bári bolady. Mańyzdysy – bári jaqsy aiaqtaldy", – dep jazdy ol.
Sondai-aq kásipker jurtty jalǵan aqparatqa ermeýge, tek senimdi derekkózderge súienýge shaqyrdy. Ol Darhanǵa tezirek saýyǵyp, jaqyndarynyń ortasyna oralýyn tiledi.
Buǵan deiin áleýmettik jelide Kislo-Sladkiidiń Tailandta joǵalyp ketkeni týraly aqparat taraǵan edi. Onyń tanystary men shyǵarmashylyq toby reperdiń bailanysqa shyqpai qalǵanyn aityp, dabyl qaqqan.
Mýzykalyq klipter rejisseri Parasat.top ánshiniń tańerteń Phýketten Bangkokke ushyp kelýi kerek bolǵanyn, alaida belgilengen jerge jetpegenin málimdegen. Keiin reperdiń telefondary óship qalǵany aityldy.
Qazirgi tańda ánshiniń naqty qandai jaǵdaida tabylǵany tolyq aitylǵan joq. Jaqyndary eń bastysy onyń aman-esen ekenine qýanyp otyr.
