Búgin Alakól jaǵalaýynda biylǵy týristik maýsymnyń resmi ashylýyna arnalǵan «Alakól alaýlary – 2026» festivali ótti. Aýqymdy sharaǵa oblys ákimi Berik Ýáli qatysyp, turǵyndar men demalýshylardy týristik maýsymnyń ashylýymen quttyqtady, dep habarlaidy dalanews.kz.
Aimaq basshysy Alakóldiń tabiǵi ereksheligi men tarihi mańyzyna toqtalyp, kóldiń búginde elimizdiń ǵana emes, sheteldik týrister de qyzyǵýshylyq tanytatyn biregei demalys ornyna ainalǵanyn atap ótti.
«Sonaý este joq eski zamandardan sulýlyqtyń simvoly, dalamyzdyń eń bir este qalar kórkem núktesi retinde ǵalymdar men saiahatshylardyń, jihangezderdiń jazbalarynda tutas Aziia men Eýropaǵa aty ketken dańqty meken Alakól. Búginde Alakól elimizdiń túpkir-túpkirinen ǵana emes, kórshiles memleketter men alys shet elderden týrister aǵylyp keletin uiyq meken, jan tynyshtyǵyn syilaityn qaiyrly qonysqa ainaldy. «Alakól alaýlary» festivali biyl tuńǵysh ret ótkizilip otyr. Búgingi sharaǵa Qazaqstannyń Halyq ártisi Seken Turysbek bastaǵan elimizdiń mańdaialdy ónerpazdary, búgingi jas tolqynnyń daryndy daýylpazdary arnaiy keldi. Barshańyzdy elimizdiń injý-marjany, aýasy bal, sýy em qasietti Alakóldegi biylǵy jazǵy demalý maýsymy bastalýymen shyn júrekten quttyqtaimyn», – dedi Berik Ýáli.
Aimaq basshysy osyndai kontserttik baǵdarlamalar tamyz aiyna deiin jalǵasyp, aptasyna eki ret, sársenbi, senbi kúnderi usynylyp otyratynyn aitty. Óńirdiń qala-aýdandarynyń ónerpazdary, «Abai eli – óner kenishi» oblystyq baiqaýyna qatysqan ánshi, bishi, kúishiler kelip, demalýshylarǵa kóterińki kóńil-kúi syilaityn bolady.
Festival aiasynda Qazaqstannyń Halyq ártisi, kúishi-kompozitor Seken Turysbek, dástúrli án óneriniń ókili Dinislambek Jailaýbai, sondai-aq, qazaq estradasynyń tanymal juldyzdary Dana Kentai, Erkesh Hasen, Qanai jáne Zarina Omarova óner kórsetti. Ónerpazdardyń ásem ánderi men kúmbirlegen kúileri Alakól jaǵalaýyna jinalǵan kórermenderge erekshe áser syilap, merekelik keshtiń sánin kirgizdi. Shara merekelik otshashýmen aiaqtaldy.
Aita keteiik, týristik maýsym qarsańynda Alakól jaǵalaýynda infraqurylymdy jańartý jáne abattandyrý jumystary júrgizildi. Prezident tapsyrmasy aiasynda demalýshylarǵa qolaily jaǵdai jasaý maqsatynda jaǵalaýǵa 50-den astam sanitarlyq-gigienalyq torap ornatylyp, 35 dýsh kabinasy, 110 kiim aýystyrý orny, 100 qoqys konteineri jáne 150 qoqys jinaýǵa arnalǵan konteiner jańadan qoiyldy.
📊Týristerdiń qaýipsizdigin qamtamasyz etý maqsatynda jaǵalaýǵa uzyndyǵy 5 myń metr bolatyn qalqanshalar ornatyldy. 224 beinebaqylaý kamerasy jumys istep tur. Sońǵy eki jylda kól jaǵalaýynda 10 shaqyrym kóshe joldaryna asfalt tóseldi. Erekshe atap óterligi, biyl Úkimettiń qoldaýymen uzyndyǵy 72 shaqyrym bolatyn «Kóktal-Alakól» elektr jelisiniń qurylysy bastaldy. Bul joba Alakól jaǵalaýyndaǵy elektr qýaty tapshylyǵy máselesin túbegeili sheshýge múmkindik beredi.
