Turǵyndardyń ekologıalyq buzýshylyq boıynsha jappaı shaǵymdarynan keıin SHQO-da Rıdder qalasyndaǵy kásiporyndardyń biriniń jumysy úsh aıǵa toqtatyldy. Joǵary sot osyndaı sheshim shyǵardy, dep habarlaıdy Dalanews.kz. 

Turǵyndar shaǵymynan keıin júrgizilgen jospardan tys tekserý nátıjesinde JSHS ózi jalǵa alǵan aýmaqta óndiristik qaldyqtardy qaıta óńdeý zaýytynyń qurylysyna daıyndyq jumystary aıasynda konstrýksıalardy qurastyrý boıynsha dánekerleý jumystaryn jáne alańdy tazartý boıynsha jer qazý jumystaryn júrgizgeni anyqtaldy.

"Bul rette qorshaǵan ortaǵa emısıalar mindetti ekologıalyq ruqsatsyz esepke alynǵan, bul Ekologıalyq kodekstiń 106-babyn buzý bolyp tabylady jáne ÁQBtK-niń 328-babynyń 4-bóligine jatady. JSHS-niń basqarýshy dırektory sotta arbalardy dánekerleýdiń shamaly ǵana júrgizilgenin, onyń pikirinshe, qazý jumystary júrgizilmegenin túsindirdi. Tek aýmaqty tazalaý jumystary júrgizilgen, ony qazý jumystarymen teńestirýge bolmaıdy. Sondaı-aq bul baǵyttaǵy is-sharalardy toqtatyp, qalanyń ındýstrıaldy aımaǵynan basqa ýchaskeni tańdap, tehnıkalardy sol jerge josparly túrde kóshirý týraly baıandady. Biraq ol jaýapkershiligi shekteýli seriktestikte (JSHS) qajetti ekologıalyq ruqsattyń joqtyǵyn joqqa shyǵarmady", delingen Joǵary sot habarlamasynda.

JSHS ókilderi kinálaryn moıyndamaı, olardyń áreketi qurylys jumystarynyń sıpatyna jatpaıtynyn alǵa tartqanyna qaramastan, sot qurylys-montajdaý qyzmetiniń bastalýy jáne ruqsat qujatynyń joqtyǵy faktisin anyqtady, bul turǵyndar usynǵan tekserý aktilerimen jáne fotomaterıaldarmen rastalady.

Ákimshilik quqyq buzýshylyq isteri jónindegi mamandandyrylǵan sot isti oqıǵa ornynda qarap, JSHS-niń áreketi qorshaǵan ortaǵa keri áserin tıgizgen degen qorytyndyǵa keldi. JSHS ÁQBtK-niń 328-babynyń 4-bóligimen kináli dep tanylyp, oǵan ákimshilik jaza taǵaıyndaldy: úsh aıǵa qyzmetke tyıym salýmen 1,9 mln teńge aıyppul salyndy.

Qaýly zańdy kúshine engen joq.