Biyl elge 40 mlrd teńge kóleminde zańsyz shyǵarylǵan aktivter qaitaryldy, dep habarlaidy dalanews.kz.
Bas prokýror Berik Asylov vedomstvonyń birinshi jartyjyldyqtaǵy jumys qorytyndysyna arnalǵan keńeitilgen alqa otyrysynda zańsyz shyǵarylǵan aktivterdi qaitarý jumystarynyń nátijesin jariialady.
Onyń aitýynsha, jyl basynan beri elge jalpy kólemi 40 mlrd teńge bolatyn aktivter qaitarylǵan. Onyń 37,7 mlrd teńgesi aqshalai qarajat bolsa, 2,3 mlrd teńge múlik túrinde berilgen.
Sondai-aq, arnaýly memlekettik qor esebinen 39 áleýmettik nysan iske qosylǵan. Olardyń qatarynda Aqtaýdaǵy jedel járdem stantsiiasy, Shymkenttegi stýdentter jataqhanasy, Astanadaǵy Qajymuqan Muńaitpasov atyndaǵy fýtbol stadiony jáne Balqash áýejaiyn jańǵyrtý jobasy bar. Budan bólek, ózge de mańyzdy áleýmettik nysandar paidalanýǵa berilgen.
