Agenttiktiń Almaty qalasy boiynsha departamenti prokýratýranyń úilestirýimen júrgizgen tergeý barysynda 2023–2024 jyldary «Bal halal» JShS Ǵylym qorynan tórt jobaǵa jalpy somasy 1,15 mlrd teńge qarjy alǵany anyqtalǵan, dep habarlaidy dalanews.kz.
Jobalar ósimdik shikizatynan innovatsiialyq makaron ónimderin óndirýdi jáne mikronýtrienttermen baiytylǵan un shyǵarýdy kózdegen.
Bólingen qarajatqa óndiristik jabdyqtar satyp alý, tsehtardy daiyndaý, shikizat pen qajetti bólshekter alý, montajdaý jáne jóndeý jumystaryn júrgizý, sondai-aq daiyn ónim shyǵarýdy uiymdastyrý josparlanǵan.
Alaida tergeý eksperimentteri kezinde satyp alynǵan jabdyqtardyń jobada kózdelgen ónimdi óndirýge jaramsyz ekeni anyqtalǵan.
Aqshany basqa kompaniialardyń shottary arqyly shyǵarǵan
Tergeý málimetinshe, qarajatty shyǵarý úshin úlestes tulǵalardyń atyna tirkelgen «SMART 15» JShS paidalanylǵan. Jabdyqtar men ózge de qyzmetterdiń aqysyn tóleý degen jeleýmen atalǵan kompaniianyń shottaryna 736,4 mln teńge aýdarylǵan.
Sondai-aq bul iske «Fabrika reklamy Shymkent», «Jana tan» JShS jáne «Sisters Brand KZ» jeke kásipkerligi de qatysqan.
Sonymen qatar jobalardyń oryndalýyn baqylaý jumystary formaldy túrde júrgizilgen. Monitoring aktileri óndiris oryndaryna barmai-aq jáne atqarylǵan jumystardy teksermei jasalǵan. Qujattardy «Bal halal» JShS qyzmetkerleri daiyndap, monitoring toptarynyń músheleri qol qoiǵan. Osylaisha memlekettik qarajattyń maqsatty jumsalýyn baqylap otyrǵandai kórinis qalyptastyrylǵan.
Tergeý nusqasy boiynsha, kúdikti qolma-qol aqshaǵa ainaldyrylǵan qarajattyń 88,5 mln teńgesin keiin «Bal halal» JShS shottaryna qaita salyp, ony jobalardy birlesip qarjylandyrýǵa arnalǵan óziniń qarajaty retinde kórsetken.
Memleketke 945 mln teńge shyǵyn kelgen
Nátijesinde memleketke keltirilgen jalpy shyǵyn 945 mln teńgeni quraǵan.
Kúdikti qamaýǵa alynǵan. Sot sanktsiiasymen onyń quny 830 mln teńge bolatyn múlkine tyiym salynǵan. Olardyń qatarynda:
5 jer ýchaskesi;
4 avtokólik;
elordadaǵy páter;
kommertsiialyq nysan;
zergerlik buiymdar bar.
Qazirgi ýaqytta tergeý aiaqtalǵan. Qylmystyq-protsestik kodekstiń 201-babyna sáikes, ózge aqparat jariia etilmeidi.
