Qazaqstan halqynyń basym bóligi internetke qosylǵanymen, elde áli de jelini paidalanbaityn 1,4 millionǵa jýyq adam bar. Bul halyqtyń 6,6 paiyzyna teń. Mundai málimet DataReportal halyqaralyq analitikalyq platformasynyń 2026 jylǵy 5 qarashada jariialanǵan Digital 2027: Kazakhstan esebinde keltirilgen, dep habarlaidy dalanews.kz.
Zertteý avtorlary 2026 jylǵy qazandaǵy jáne oǵan deiingi kezeńderdegi derekterdi saralaǵan. Taldaý barysynda Halyqaralyq elektr bailanysy odaǵynyń, GSMA Intelligence, Ookla jáne áleýmettik jelilerdiń jarnamalyq quraldaryndaǵy málimetter paidalanylǵan.
"2026 jylǵy qazanda Qazaqstandaǵy internet qoldanýshylar sany 19,7 million adamǵa jetti. Bul el halqynyń 93,4 paiyzyn quraidy", – delingen esepte.
Bir jyl ishinde jeli qoldanýshylarynyń qatary 221 myń adamǵa, iaǵni 1,1 paiyzǵa artqan. Alaida internetpen qamtylǵan turǵyndardyń jalpy úlesi ózgermei, burynǵy 93,4 paiyz deńgeiinde qalǵan.
Sonymen qatar zertteýde internetti múlde paidalanbaityn turǵyndardyń naqty sebebi kórsetilmegen. Sondyqtan olardyń jelige tehnikalyq múmkindik bolmaǵandyqtan qosylmai júrgeni nemese internetten ózge sebeptermen bas tartqany belgisiz.
Qazaqstandaǵy mobildi bailanys sany halyq sanynan da asyp túsken. Qazir elde 28,4 million belsendi mobildi qosylym bar. Bul halyq sanynyń 134 paiyzyna sáikes keledi. Bir jylda olardyń sany 712 myńǵa kóbeigen.
"Mobildi qosylym sanynyń turǵyndar sanynan kóp bolýy bir adamnyń birneshe SIM-karta nemese eSIM paidalanýymen bailanysty. Onyń ústine barlyq mobildi qosylym internetke kirýge arnalmaǵan", – dep túsindiredi zertteý avtorlary.
