"Eýrazıalyq qarjy kompanıasy" (EQK) aksıonerleri arasyndaǵy korporatıvtik shıelenis jańa sıpat alyp, órshı túsýde. Áýelde daý kompanıanyń negizgi aksıonerleri – Shýhrat Ibragımov pen Patoh Shodıevtyń bir-birine qarsy sotqa shaǵym túsirýinen bastalǵan edi. Al endi sotqa kompanıanyń ózi men Shodıevtyń qyzy da tartylýda, dep habarlaıdy Dalanews.kz.

Eske sala ketsek, Shýhrat Ibragımov 2025 jyldyń 2 maýsymynda dırektorlar keńesi qabyldaǵan sheshimderdi oryndatý úshin sotqa aryz bergen. Buǵan jaýap retinde kompanıanyń 33% aksıasyna ıe Patoh Shodıev te sotqa júginip, dırektorlar keńesiniń sol kúngi sheshimderin zańsyz dep tanýdy talap etken. Sondaı-aq, ol kompanıadan kezekten tys jalpy aksıonerler jınalysyn ótkizýdi mindetteýdi de suraǵan bolatyn.

"Qazirgi ýaqytta bul daýdyń aýqymy keńeıip, oǵan kompanıanyń ózi, sonymen qatar Patoh Shodıevtyń qyzy Mýnısa Shodıeva da aralasýda", dep jazady Rýchnaıa ekonomıka Telegram arnasy.

Eýrazıalyq qarjy kompanıasy óz dırektorlar keńesiniń músheleri – Shýhrat Ibragımov pen Andreı Kopovqa qarsy talap qoıyp, olardyń is-áreketterin, sondaı-aq keńes qabyldaǵan sheshimderdi zańsyz dep tanýdy talap etti. Aıta keterligi, Andreı Kopov 2023 jyldyń tamyzynan beri kompanıanyń táýelsiz dırektory bolyp tabylady.

Sondaı-aq, Patoh Shodıev pen Shýhrat Ibragımovtyń bir-birine qarsy talaptary boıynsha júrip jatqan eki azamattyq iske úshinshi tarap retinde Shodıevtyń qyzy – Mýnısa Shodıeva da tartyldy. Ol Eýrazıalyq qarjy kompanıasynyń dırektorlar keńesiniń múshesi retinde sotqa derbes talap qoıyp, Ibragımov pen Kopovtyń, sondaı-aq keńestiń sheshimderin zańsyz dep tanýdy surap otyr.

Sot barlyq aryz-shaǵymdardy bir iske biriktirip, keshendi túrde qarastyrý týraly sheshim qabyldady.