Almaty oblystyq politsiia departamenti Hasan Qasymbaevqa qatysty qylmystyq istiń sotqa deiingi tergeýin aiaqtady, dep habarlaidy Dalanews.kz Kazinform agenttigine silteme jasap.
Prokýratýranyń dereginshe, oblystyq politsiia departamentiniń tergeý basqarmasy Hasan Qasymbaev pen basqa tulǵalarǵa qatysty isti tergep, 2025 jyldyń 21 shildesinde aiyptaý aktisimen birge oblystyq prokýratýraǵa tapsyrǵan. Al 29 shildede aiyptaý aktisi bekitilip, is máni boiynsha qaraý úshin Talǵar aýdandyq sotyna jiberilgen.
Politsiia departamentiniń aqparatyna sáikes, Hasan Qasymbaevqa qatysty adam urlaý, qasaqana aýyr dene jaraqatyn salý jáne bopsalaý baptary boiynsha tergeý júrgizilgen.
Eske salaiyq, 2024 jylǵy 2 qarashada Qasymbaev 2021 jyldyń maýsymynda jasalǵan qasaqana aýyr dene jaraqatyn keltirý jáne adam urlaý kúdigimen ustaldy. Keiin oǵan bopsalaý aiyby da taǵyldy.
Hasan Qasymbaevtyń esimi jurtshylyqqa 16 jastaǵy Sherzat Bolattyń Talǵardaǵy óliminen keiin keńinen tanyldy. Áleýmettik jeli qoldanýshylary ony "Hýtorskie" degen ataýmen belgili qylmystyq toppen bailanystyryp jazǵan.
Alaida Ishki ister ministrligi mundai uiymdasqan qylmystyq toptyń tirkelmegenin, sondai-aq Hasan Qasymbaevtyń Sherzat Bolattyń ólimine qatysy joq ekenin málimdegen.
2024 jylǵy 4 qazanǵa qaraǵan túni Talǵar qalasyndaǵy dúkenderdiń biriniń janynda jastar arasynda qaqtyǵys bolyp, saldarynan 16 jastaǵy Sherzat Bolat pyshaq jaraqatynan qaza tapty. Taǵy eki jasóspirim aýyr jaraqat alǵan edi.
Bul is boiynsha sot úkimi 2025 jylǵy 5 maýsymda shyǵaryldy.
