Mańǵystaý oblysynda tehnikalyq kolledjdiń bas býhgalteri 243 million teńge kólemindegi stipendiia men issapar aqshasyn jymqyrǵany úshin sottaldy, dep habarlaidy Dalanews.kz.
Oblystyq prokýratýranyń málimetinshe, qańtar aiynda qadaǵalaýshy organ bul iske qatysty sotqa deiingi tergeýdiń bastalǵanyn jáne birqatar saraptama júrgizilgenin málimdegen. Tergeýdi arnaiy prokýrorlar júrgizdi.
Tekserý nátijesinde býhgalterdiń stýdentterdiń stipendiiasyna, issapar shyǵyndary men salyq tólemderine arnalǵan qarjyny óziniń jeke shotyna zańsyz aýdaryp otyrǵany anyqtalǵan. Jalpy jymqyrylǵan soma — 243 million teńge.
Mańǵystaý aýdandyq soty aiyptalýshyny asa iri kólemde senip tapsyrylǵan bóten múlikti iemdený jáne talan-tarajǵa salý baby boiynsha kináli dep tanydy. Oǵan 5 jyl bas bostandyǵynan aiyrý jazasy taǵaiyndaldy. Sonymen qatar 10 jylǵa deiin býhgalterlik qyzmetpen ainalysý quqyǵynan aiyryldy.
