Qasym-Jomart Toqaev pen Antoniý Gýterrish Almaty qalasyndaǵy BUU óńirlik ortalyǵynda sóz sóiledi, dep habarlaidy Dalanews.kz.
Qasym-Jomart Toqaev eń áýeli osy aitýly is-sharaǵa qatysqany úshin BUU Bas hatshysy Antoniý Gýterrishke rizashylyǵyn bildirdi.
Prezident búgingi is-sharanyń Qazaqstan ǵana emes, Birikken Ulttar Uiymy úshin de eleýli sipatqa ie ekenin atap ótti. Bul oqiǵa dúniejúzilik kartada óte salmaqty aktorǵa ainalyp kele jatqan Ortalyq Aziianyń mańyzy jóninde halyqaralyq qoǵamdastyqqa aiqyn belgi bergenin jetkizdi.
Memleket basshysynyń aitýynsha, qol qoiylǵan kelisim arqyly Ortalyq Aziia men Aýǵanstan úshin ornyqty damý maqsattary jónindegi óńirlik ortalyqtyń qurylýy resmi túrde bekitildi. Bul – Qazaqstan men BUU arasyndaǵy uzaq merzimdi jáne jemisti yntymaqtastyqtyń mańyzdy kezeńi.
"Geosaiasi dúrbeleńder men qaqtyǵystar beleń alyp, klimattyq ózgerister kúrdelengen jáne azyq-túlik qaýipsizdigine qater tóngen shaqta Birikken Ulttar Uiymy álemdegi qaýipsizdik pen turaqtylyqty saqtaýda basty ról atqarýǵa tiis. Qazaqstan úshin BUU halyqaralyq tártiptiń balamasyz ári basty tiregi bolyp qala beredi. Elimiz Uiymǵa kirgen sátten bastap, 33 jyl boiy halyqaralyq qoǵamdastyqtyń jaýapty, belsendi ári beibitsúigish múshesi ekenin jan-jaqty tanytyp keledi", – dedi Prezident.
Qasym-Jomart Toqaevtyń pikirinshe, Almaty qalasynda BUU óńirlik ortalyǵynyń ashylýy aimaqtyń strategiialyq mańyzy artyp kele jatqanyn kórsetedi.
"Búginde Ortalyq Aziia birligi bekem jáne tatý kórshilik pen ortaq progress qaǵidattaryna beiil óńir ekenin etip keledi. Aimaq elderi saiasi jáne áleýmettik reformalar júrgizip, ekonomikany ártaraptandyrý boiynsha batyl sharalar qabyldap jatyr. Adam kapitalyn damytýǵa kúsh salyp, anaǵurlym inkliýzivti institýttar qurýdy qolǵa aldy. Biz halyqaralyq ózekti máselelerdi sheshýge belsendi aralasatyn mámileger retinde Ortalyq Aziianyń áleýetin ashýǵa jáne jahandyq arenada konstrýktivti ári keleshekti kózdegen kún tártibin dáiekti túrde ilgeriletýge umtylamyz. Osy oraida Almaty qalasynda BUU óńirlik ortalyǵyn ashý ýaqtyly jáne strategiialyq turǵydan mańyzdy qadam bolyp otyr", – dedi Memleket basshysy.
Prezident Ortalyq aimaqtaǵy elder ekonomikasynyń ornyqtylyǵy men qarqynyn kúsheitýge, óńirlik innovatsiiany damytýǵa jáne yntymaqtastyqty tereńdetýge baǵyttalǵan úilesimdi is-qimyldar katalizatory bolady dep paiymdaidy.
"Atalǵan Ortalyqtyń quzyreti men fýnktsiialary aimaqtaǵy nemese odan tysqary jerlerdegi basqa uiymdardyń qyzmetin qaitalamaidy. Kerisinshe, Ortalyq aimaq halqynyń naqty suranysyna nazar aýdarýdyń arqasynda qabyldanyp jatqan sharalardy tolyqtyryp, onyń mán-mazmunyn arttyra túsedi. Aral teńizindegi ekologiialyq daǵdarys pen Kaspii teńiziniń tartylýy siiaqty Ortalyq Aziia problemalary barshaǵa belgili. Bul túitkilderdiń tiimdi sheshimin tabý úshin óńirlik yqpaldastyqty nyǵaityp, oǵan Birikken Ulttar Uiymyn belsendi túrde tartý qajet. Osy rette Qazaqstan kelesi jyldyń sáýir aiynda Astanada BUU agenttikterimen birge Óńirlik ekologiialyq sammit ótkizedi", – dedi Memleket basshysy.
